Şeirin səsi: Yazıçılar Birliyində Fikrət Qocaya həsr olunan poeziya günü
Mayın 1-də Yazıçılar Birliyində Azərbaycanın Xalq şairi Fikrət Qocanın həyat və yaradıcılığına həsr olunmuş poeziya seminarı keçirilib.
Tədbir “Azərbaycanın müasir şairləri” ədəbi layihəsi çərçivəsində təşkil olunub.
Seminarı şairə, Azərbaycan Yazıçılar Birliyinin və Dünya Yazıçılar Təşkilatının (WOW) üzvü, “Azərbaycanın Müasir Şairləri” layihəsinin rəhbəri Lalə Həsənova açıb.
Crossmedia.az xəbər verir ki, tədbirdə şair, bir çox beynəlxalq poeziya və ədəbi müsabiqələrin laureatı, Rusiyanın Rus Xalq Poeziyası Akademiyasının akademiki Zaur Cəfərov, Azərbaycan və Rusiya Yazıçılar birliklərinin fəxri üzvü, Dünya Yazıçılar Təşkilatının əlaqələndirmə şurasının rəhbəri Eldar Əhədov, Azərbaycan Yazıçılar və Jurnalistlər birliklərinin, Respublika Qadın Cəmiyyəti və Dünya Türk Qadınları Cəmiyyətinin üzvü Güləmail Murad çıxış ediblər.
Tədbirin proqramında Fikrət Qocanın şeirləri, habelə onun dostları - tanınmış şair və tərcüməçilər Alla Axundova, Mənsur Vəkilov, Aleksandr Qriç, Siyavuş Məmmədzadənin tərcümələrində rus dilində əsərləri yer alıb.
Xalq şairinin şeirlərini, həmçinin Zaur Cəfərov, Lalə Həsənova, Tatyana Artyomkina, Olqa Şalayeva, Türkan Bayramzadə, Günatay Hüseynova, Ziba Eyyubova, Səbinə Əliyeva, Nell Küri, Renat İlyazov, Zivərxanım Məmmədova, Bayram Məhərrəmov, Arzu Manaf təqdim ediblər.
Qeyd edək ki, qonaqlar arasında şairin yaxınları, Azərbaycan Yazıçılar Birliyinin üzvü - baş redaktor Elvira Quluzadə, mədəniyyət xadimləri və yaradıcı şəxslər də olublar.
Tədbirin sonunda şairin yaxınları - Xalq şairinin bacısı, Azərbaycan Respublikası Milli Elmlər Akademiyasının Ədəbiyyat İnstitutunun aparıcı elmi işçisi, filologiya üzrə fəlsəfə doktoru Güldəniz Qocayeva, onun daha bir bacısı, “Azərbaycan Milli Ensiklopediyası”nın redaksiya müdiri, “Vətənə xidmətə görə” ordeninə layiq görülmüş Gülbəniz Qocayeva təəssüratlarını bölüşüblər.
Zaur Cəfərov, həmçinin seminarın təşkilində göstərdiyi köməyə görə Azərbaycan Yazıçılar Birliyinə xüsusi təşəkkürünü bildirib, ədəbi irsin qorunub saxlanması üçün belə təşəbbüslərin əhəmiyyətini vurğulayıb.
18:06 02.05.2025
Oxunuş sayı: 11326
