Ukrayna ilə ABŞ arasında strateji resurslar və investisiyalar sahəsində yeni əməkdaşlıq sazişi imzalanıb
Ukrayna və ABŞ arasında imzalanmış yeni razılaşma iki ölkə arasında enerji, faydalı qazıntılar və investisiya sahəsində əməkdaşlığı gücləndirməyə yönəlib. Razılaşmaya əsasən, Ukraynanın strateji resursları və dövlət müəssisələrinin mülkiyyəti qorunub saxlanılacaq.
Crossmedia.az-ın məlumatına görə imzalanan sənəddə qeyd olunur ki, Ukraynada mövcud olan bütün təbii ehtiyatlar – o cümlədən neft, qaz, uran, litium və nadir torpaq metalları – dövlət mülkiyyətində qalacaq və bu, müqavilə ilə təminat altına alınıb. Eyni zamanda, “Ukrnafta” və “Enerqoatom” kimi iri dövlət şirkətlərinin hüquqi statusunda heç bir dəyişiklik nəzərdə tutulmur.
İnvestisiya sahəsində isə Kiyev və Vaşinqton bərabər hüquqlarla 50/50 əsaslı yeni bir fond yaradacaq. Bu fond yalnız yeni layihələrdən – o cümlədən neft, qaz və strateji minerallar sahəsində veriləcək lisenziyalardan əldə edilən gəlirlərlə formalaşacaq. Fondun idarəçiliyində tərəflər arasında veto hüququ olmayacaq.
ABŞ şirkətlərinə Ukraynada bir sıra güzəştlər təqdim olunacaq: dollarla qazanc götürmək azadlığı, sabit vergi şərtləri, lisenziyaların asanlaşdırılmış verilməsi və dövlət-özəl əməkdaşlıq çərçivəsində üstünlük hüququ.
Razılaşmaya əsasən, Ukrayna ABŞ investorlarının maraqlarını qorumağa, qanunvericilik dəyişikliklərinə baxmayaraq, mövcud razılaşmaları pozmamağa, lisenziyaları ləğv etməməyə və resursları milliləşdirməməyə öhdəlik götürür.
Eyni zamanda, ABŞ-dan daxil olan vəsaitlərin ölkədən çıxarılmasına məhdudiyyət qoyulmayacaq və dollarla əməliyyatlara vergi tətbiq olunmayacaq. Müqavilənin hüquqi statusu Ukrayna qanunvericiliyindən üstün sayılır və istənilən ziddiyyətli halda birbaşa tətbiq ediləcək.
Sənədin müddəti isə açıqdır – yalnız tərəflərdən biri ləğv etmə qərarı verərsə, müqavilə qüvvədən düşə bilər. Əlavə olaraq, Ukrayna müqavilə təkliflərində ABŞ-a prioritet verməyə və digər ölkələrin alternativ təkliflərinə üstünlük verməzdən əvvəl Vaşinqtonla razılaşmağa borcludur.
16:10 01.05.2025
Oxunuş sayı: 752
