Paşinyan Moskvada Putinlə münasibətləri bərpa etməyə çalışacaq
Ermənistanın baş naziri Nikol Paşinyan bu il 9 Mayda İkinci Dünya Müharibəsində Qələbənin 80 illiyinə həsr olunmuş tədbirlərdə iştirak etmək üçün Rusiyanın paytaxtı Moskvaya səfər edəcək. Erməni mətbuatının yazdığına görə, baş nazir səfər çərçivəsində Moskvada gecələməyi də planlaşdırır.
Crossmedia.az xarici mediaya istinadən bildirir ki, Ermənistanın “Joxovurd” qəzetinin məlumatına görə, Nikol Paşinyan bu səfəri vasitəsilə səhnəarxası görüşlər təşkil edərək bəzi xarici siyasət məsələlərini yoluna qoymağa və xüsusilə Rusiya rəhbərliyinin – həm Kreml, həm də prezident Vladimir Putinin – etimadını yenidən qazanmağa çalışacaq.
Qəzet qeyd edir ki, hazırda səfərlə bağlı heç bir rəsmi açıqlama verilməyib. Baş nazirin mətbuat xidməti jurnalistlərin səfər detalları ilə bağlı sorğusuna cavab olaraq yalnız “Paşinyanın bütün səfərləri ilə bağlı vaxtında və müvafiq məlumat təqdim edilir” cavabını verib.
Müşahidəçilər bu səfəri Ermənistan-Rusiya münasibətləri kontekstində xüsusi əhəmiyyətli hesab edirlər. Son aylarda iki ölkə arasında münasibətlərin gərginləşdiyi müşahidə olunur, xüsusilə təhlükəsizlik və regional siyasətlə bağlı fikir ayrılıqları gündəmdədir.
Paşinyanın Moskvada keçirəcəyi görüşlərdə hansı konkret məsələlərin müzakirə olunacağı hələlik bilinmir. Lakin “Joxovurd”un mənbələri hesab edir ki, baş nazir bu səfəri öz mövqeyini gücləndirmək və Rusiya ilə münasibətləri normallaşdırmaq üçün bir fürsət kimi dəyərləndirir.
Fatimə Nəbiyeva
15:35 01.05.2025
Oxunuş sayı: 588
