Rusiya XİN: Ermənistanın Avropa yolunu seçməsi Aİİ ilə münasibətlərin yenidən baxılmasını tələb edə bilər
Ermənistan Avropa İttifaqı ilə inteqrasiyanı seçərsə, bu, ölkənin Avrasiya İqtisadi İttifaqı (Aİİ) çərçivəsindəki iqtisadi əlaqələrini yenidən nəzərdən keçirməsini tələb edə bilər. Crossmedia.az bildirir ki,bu barədə Rusiya xarici işlər nazirinin müavini Mixail Qaluzin “İzvestiya” qəzetinə verdiyi müsahibədə bildirib. O, bu prosesin Ermənistan əhalisi üçün də ağrılı nəticələr doğura biləcəyini qeyd edib.Qaluzin vurğulayıb ki, Rusiya Ermənistanı sıxışdırmaq niyyətində deyil, çünki iki ölkə arasında müttəfiqlik münasibətləri və ortaq tarixi keçmiş mövcuddur. 2023-cü ildə iki ölkə arasında ticarət dövriyyəsi təxminən 12 milyard dollar təşkil edib.
Onun sözlərinə görə, Avropa İttifaqı və Aİİ-yə eyni zamanda üzv olmaq mümkün deyil – bu iki qurum arasında iqtisadi strukturlar və gömrük tənzimləmələri fərqlidir. Ermənistanın qarşısında seçim dayanır: ya Aİ ilə inteqrasiyanı dərinləşdirmək, ya da Aİİ-də qalmaq. Rusiya rəsmisi qeyd edib ki, Aİİ üzvlüyü artıq Ermənistanın ÜDM-nin 6% artmasına töhfə verib.Qaluzin əlavə edib ki, Aİ-nin Ermənistana təklif etdiyi tələblər çoxdur, lakin real üzvlük perspektivləri qeyri-müəyyəndir. Üstəlik, Ermənistanın Aİ ilə ticarət dövriyyəsi Rusiyayla müqayisədə əhəmiyyətli dərəcədə azdır, və Avropa İttifaqı Rusiyaya qarşı düşmən mövqe sərgiləyir.
O həmçinin qeyd edib ki,Rusiya ümid edir: Ermənistan vəziyyəti sağlam düşüncə ilə qiymətləndirəcək. Hələlik İrəvan Aİİ və MDB çərçivəsində iştirakını qoruyur və 2024-cü ildə Aİi-yə uğurla sədrlik edib.
Fidan Xəlilova
12:35 14.04.2025
Oxunuş sayı: 6638
