NDU-da təhsil tələbə krediti ilə bağlı növbəti görüş keçirilib
Naxçıvan Dövlət Universiteti ilə Təhsil Tələbə Krediti Fondu arasında görüş keçirilib. Universitetin Media və ictimaiyyətlə əlaqələr şöbəsindən bildirilib ki, tədbirdə Naxçıvan Dövlət Universitetinin (NDU) rektoru Elbrus İsayev Təhsil Tələbə Krediti Fondunun (TTKF) fəaliyyətini və universitet ilə əməkdaşlığını yüksək qiymətləndirib. Qeyd edib ki, təhsil sahəsinin inkişafı ölkəmizdə prioritet istiqamətlərdən biridir.
Rektor vurğulayıb ki, təhsilin əlçatanlığının təmin olunması fondun tələbələr üçün yaratdığı xüsusi imkanlardır və universitetdə təşkil olunan TTK ilə bağlı məlumatlandırma və təşviq xarakterli görüşlərdə bu imkanlar diqqətə çatdırılır. Elm və Təhsil Nazirliyinin tabeliyində Təhsil Tələbə Krediti Fondunun idarə heyətinin sədri Bəhruz Əzimov fondun yaranma tarixi, məqsədi haqqında geniş məlumat verib. Qeyd edib ki, fondun yaradılmasında əsas məqsəd əhalinin aztəminatlı təbəqəsindən olan şəxslərin təhsili üçün bərabər imkanlar yaratmaq və təhsilin əhatə dairəsini genişləndirməkdir.
Bəhruz Əzimov təhsil tələbə kreditinin sosial və standart növləri və tətbiq edilən güzəştləri diqqətə çatdırıb. Elm və Təhsil Nazirliyi Aparatının baş məsləhətçisi Cabbar Hüseynli kreditlər veriləndə ilkin mərhələdə giriş balları nəzərə alınmaqla yüksək nəticə göstərilməsi yönündə ilkin şərti diqqətə çatdırıb. Kredit məbləğinin birbaşa tələbəyə deyil, ali təhsil aldığı müəssisəyə verildiyini vurğulayıb. Hər hansı səbəbdən götürülən kredit geri qaytarıla bilmədikdə tələbəyə möhlət hüququ verildiyini söyləyib. Həmçinin, tələbənin valideynləri işləmirsə və ya qruplar üzrə əlilliyi mövcuddursa həmin tələbənin sosial tələbə kreditindən istifadə edə biləcəyini bildirib.
Universitetin Monitorinq və qiymətləndirmə sektorunun müdiri Elgün Tağıyev fond yarandığı gündən NDU-da TTK-ya müraciət sayını diqqətə çatdırıb. İllər üzrə statistikalarda müraciətlərin daim artdığını bildirib. Vurğulayıb ki, bu günə qədər NDU-da TTK-ya 1 308 müraciət olub, 1091 müraciət rəsmiləşib. Rəsmiləşən müraciətlərin 272-si sosial, 819-u isə standart təhsil tələbə kreditinə aid olub. Sonda tələbələri maraqlandıran suallara aydınlıq gətirilib.
07:22 08.04.2025
Oxunuş sayı: 8631
