İsrail Qəzzada quru əməliyyatlarını genişləndirir – məqsəd əhalini didərgin salmaqdır
İsrail hökuməti Qəzza zolağında hərbi əməliyyatları genişləndirərək ərazinin 25%-ni işğal etməyi və bununla da HƏMAS-ın əlində olan girovların azad edilməsinə təzyiq göstərməyi planlaşdırır. Bu addımın əsas məqsədi HƏMAS-ı yeni atəşkəs razılaşmasına məcbur etməkdir. Lakin bəzi rəsmilər bu strategiyanın Qəzzanın daha uzunmüddətli işğalına və nəticədə iki milyondan çox fələstinlinin məcburi köçkünə çevrilməsinə səbəb ola biləcəyindən narahatdırlar. Bəs bu vəziyyət hansı nəticələrə gətirib çıxara bilər?
Politoloq Natiq Miri Crossmedia.az-a açıqlamasında bildirib ki, İsrailin Qəzzada quru əməliyyatlarını genişləndirməsinə yaşıl işıq ABŞ-ın prezidenti Donald Trampın hakimiyyəti dövründə verilib.
Onun sözlərinə görə, vaxtilə ABŞ, HƏMAS-la İsrail rəhbərliyindən xəbərsiz danışıqlar apararaq, girovların azad edilməsi qarşılığında HƏMAS-a Qəzzanı tərk etmək və silahı yerə qoymaq təklifi edib. Bu təklifin arxasında ABŞ-ın Qəzzanı birbaşa nəzarətə götürmək planı dururdu. Lakin bu ideya nəinki HƏMAS, həm də müsəlman dünyası, xüsusilə də Türkiyə tərəfindən qəbuledilməz hesab olunub.
“ABŞ-ın təklifinə etiraz edildikdən sonra bölgədə gərginlik yenidən artdı. Netanyahunun hakimiyyətdə qalmasının yeganə yolu kimi gördüyü müharibə daha da alovlandı,” – deyə politoloq bildirib. O əlavə edib ki, Qəzzanın intensiv bombardmanı, əhalinin bölgəni tərk etməsi üçün planlı şəkildə həyata keçirilir. Məqsəd, Qəzza sakinlərinin Misirin Sina yarımadasına və İordaniyaya köçürülməsidir.
Natiq Miri qeyd edib ki, yaxın zamanda Donald Trampın Səudiyyə Ərəbistanı və digər ərəb ölkələrinə səfəri planlaşdırılır və bu məsələ həmin görüşlərdə əsas müzakirə mövzularından biri ola bilər.
“ABŞ Qəzza problemini kökündən həll etmək məqsədilə bu bölgəni nəzarətə götürmək və əhalini oradan çıxarmaq istəyir. Gələcəkdə bu ərazinin turistlər üçün kurort zonasına çevrilməsi də nəzərdə tutulur,” – deyə politoloq əlavə edib.
Sonda Natiq Miri bu siyasətin yanlış olduğunu bildirib və Trampın geosiyasi səhvlərini Qəzza məsələsində də təkrarladığını deyib: “Bu gün Qəzzada demək olar ki, hər bir insan ailə üzvünü itirib. Bu səbəbdən də hər kəs potensial HƏMAS tərəfdarına çevrilə bilər. Qisasçılıq hissi o qədər güclüdür ki, bu insanları nə pulla, nə də vədlərlə mübarizədən çəkindirmək mümkündür. Yüz nəfəri öldürməklə, min nəfərin mübarizəyə qoşulmasına zəmin yaradırlar.”
Politoloq sonda bildirib ki, bu siyasət nəticə verməyəcək və Tramp qısa müddətdə bu səhvini anlayacaq.
Fatimə Nəbiyeva
09:17 06.04.2025
Oxunuş sayı: 1710
