Regional konfransda müəllimlərin peşə vərdişlərinin təkmilləşdirilməsi məsələləri müzakirə olunub
Azərbaycan Dillər Universitetinin (ADU) təşkilatçılığı ilə Zaqatalada “Müəllimlərin professionallıq və peşə vərdişlərinin təkmilləşdirilməsi” mövzusunda 2-ci regional konfrans keçirilib. Tədbirdə Şəki-Zaqatala Regional Təhsil İdarəsinin və Zaqatala Rayon İcra Hakimiyyətinin dəstəyi ilə keçirilən konfransda şimal-qərb bölgəsinin ümumi təhsil məktəblərində ingilis, alman və fransız dillərini tədris edən 300-dək müəllim iştirak edib.
Regional Təhsil İdarəsindən bildiriilib ki, konfrans iştirakçıları əvvəlcə Ulu Öndər Heydər Əliyevin abidəsi önünə gül dəstələri düzüb, xatirəsini ehtiramla yad ediblər.
Heydər Əliyev Mərkəzində keçirilən tədbirin əvvəlində Dövlət Himni səsləndirilib, şəhidlərin xatirəsi bir dəqiqəlik sükutla yad edilib.
Konfransı Zaqatala Rayon İcra Hakimiyyətinin başçısı Mübariz Əhmədzadə açaraq, ölkəmizdə təhsilin inkişafına göstərilən yüksək dövlət qayğısından danışıb.
Azərbaycan Dillər Universitetinin rektoru, akademik Kamal Abdulla məzunlarla işin önəmini vurğulayıb, müəllimlərin peşə vərdişlərinin təkmilləşdirilməsinin, yeni tədris metodlarının tətbiqinin vacibliyini diqqətə çatdırıb. Rektor konfransın tədris metodlarını müasirləşdirmək və müəllimlər arasında təcrübə mübadiləsini genişləndirmək baxımından böyük əhəmiyyət kəsb etdiyini bildirib.
Şəki-Zaqatala Regional Təhsil İdarəsinin müdiri Günay Mahmudova çıxışında regional konfransın bölgənin xarici dil müəllimlərinin peşə fəaliyyətinin inkişafına mühüm töhfə verəcəyinə əminliyini ifadə edib. İdarə müdiri müəllimlərin peşəkarlığının artırılmasının təhsilin keyfiyyətinin yüksəldilməsi üçün zəruri olduğunu bildirib. O, ADU-nun təşkil etdiyi regional konfransların bölgədəki müəllimlər arasında təcrübə mübadiləsini təmin etmək baxımından əvəzsiz imkan yaratdığını diqqətə çatdırıb.
Konfrans 4 istiqamət üzrə panel müzakirələrlə öz işini davam etdirib. (Azərtac)
09:32 05.04.2025
Oxunuş sayı: 623
