ABŞ İrana müharibə elan edir? - ŞƏRH
Son günlər İran və ABŞ arasındakı münasibətlər daha da kəskinləşib. Tehran hökuməti hava məkanını bağlamaq və ordunu döyüş hazırlığı vəziyyətinə gətirmək barədə qərar qəbul edib. Bu addım ABŞ və İsrail qüvvələrinin regionda artan hərbi fəallığına cavab olaraq atılıb.
İranın bu qərarı, xüsusilə "The Daily Mail" nəşrinin ABŞ-nin yaxın həftələrdə İranın nüvə obyektlərinə mümkün zərbələr endirəcəyi ilə bağlı məqalə dərc etməsindən sonra gəlib. Bundan başqa, ABŞ Prezidenti Donald Tramp İranı bombalamaqla hədələyib və Tehranın Vaşinqtonla yeni nüvə sazişi bağlamayacağı təqdirdə hərbi müdaxilənin qaçılmaz olacağını bildirib.
İranın ali rəhbəri Ayətullah Əli Xamenei isə cavab olaraq xəbərdarlıq edib ki, əgər Trampın təhdidləri reallaşarsa, Vaşinqton ağır zərbə alacaq. Regionda gərginliyin artması hərbi münaqişə ehtimalını gücləndirir və Yaxın Şərqdəki qüvvələr balansına ciddi təsir göstərə bilər.
ABŞ və İran arasında siyasi böhranı barəsində Crossmedia.az-a politoloq Məhəmməd Əsədullazadə açıqlama verdi.
ABŞ və İran arasındakı siyasi gərginlik, xüsusilə nüvə sazişi ilə bağlı fikir ayrılıqları, hərbi qarşıdurma ehtimalını artırır: "İran Vaşinqtonun şərtlərini qəbul etmədiyini bildirərək, bunu özünün "qırmızı xətti" elan edib. ABŞ-nin əsas tələbləri İranın regiondakı hərbi qüvvələrdən imtina etməsi, nüvə proqramını dayandırması, ballistik raket istehsalını məhdudlaşdırması və ümumiyyətlə Yaxın Şərqdən geri çəkilməsidir. Lakin Tehran bu tələbləri rədd edir və müqavimət göstərir".
Politoloq qeyd edib ki, hər iki tərəf hərbi hazırlıq vəziyyətinə gətirilib: "İran hava qüvvələrini döyüş hazırlığına keçirib, ABŞ isə regionda, o cümlədən İraqda hərbi qüvvələrini cəmləşdirir. Hətta Ermənistana Almaniyadan gətirilən radiotexniki kəşfiyyat avadanlıqları da İran ətrafında hərbi gərginliyin artmasına işarə edir".
M.Əsədullazadə vurğulayıb ki, İrana qarşı təzyiq siyasətinin arxasında İsrailin Baş naziri Benyamin Netanyahu dayanır: "O, keçmişdə də İranla hərbi qarşıdurmanın əsas təşəbbüskarlarından biri olub. Trampın da İsrailin maraqlarına uyğun olaraq İrana qarşı hərbi əməliyyatlara dəstək verəcəyi ehtimal edilir. Bütün bunlara baxmayaraq, tərəflər arasında kompromis imkanı hələ də tam istisna edilmir. Lakin mövcud vəziyyət göstərir ki, İran və ABŞ-nin mövqeləri ciddi şəkildə ziddiyyət təşkil edir".
Xumar Emilqızı
14:24 04.04.2025
Oxunuş sayı: 1156
