Avropada antisemitizmin yayılmasına Aİ liderləri göz yumur
Macarıstanın Baş naziri Viktor Orban Avropa İttifaqı (Aİ) liderlərini Qərbi Avropada antisemitizmin yayılmasına şərait yaratmaqda ittiham edib.
Crossmedia.az xəbər verir ki, bu barədə xarici KİV yazıb.
Onun sözlərinə görə, bu proses əsasən Yaxın Şərqdən olan qanunsuz miqrasiya ilə bağlıdır.
Orban bu fikirləri İsrailin Baş naziri Benyamin Netanyahu ilə Budapeştdə keçirdiyi görüşdən sonra jurnalistlərə açıqlamasında bildirib.
"Antisemitizm Qərbi Avropaya qanunsuz miqrasiya ilə gətirilir, lakin Brüsseldəki siyasi elita bununla mübarizə aparmaq istəmir", – deyə o vurğulayıb.
Qeyd edək ki, Macarıstanın qanunsuz miqrantların ölkəyə daxil olmasına imkan verməyəcəyini bildirən Orban antisemitizmə qarşı "sıfır tolerantlıq" prinsipinin tətbiq olunacağını qeyd edib.
Baş nazirin sözlərinə görə, Macarıstanda Avropanın üçüncü ən böyük yəhudi icması yaşayır və burada onlar tam təhlükəsizlikdədirlər.
"Burada HƏMAS bayraqları dalğalanmır və heç vaxt dalğalanmayacaq", – deyə o əlavə edib. Qeyd edək ki, 2023-cü ilin oktyabrında HƏMAS-ın İsrailə hücumundan sonra Macarıstanda Fələstinə dəstək aksiyaları qadağan edilib.
Orban həmin hadisələri "İsrailin suverenliyinə qarşı ciddi və amansız hücum" adlandırıb və bunun bütün dünyaya təsir etdiyini bildirib.
"Macarıstan əvvəlcədən İsrailin öz vətəndaşlarını qorumaq və özünümüdafiə haqqını dəstəklədiyini açıq şəkildə bəyan edib", – deyə Orban vurğulayıb və Netanyahuya İsrail vətəndaşlarının təhlükəsizliyini təmin etmək işində uğurlar arzulayıb.
Xumar Emilqızı
19:03 03.04.2025
Oxunuş sayı: 1221
