Fərqli yanaşma: "Netanyahu tarixə düşəcək, qəhrəmana çevriləcək"
İsrailin Baş naziri Benyamin Netanyahunun keçmiş sözçüsü Eliezer Feldşteyn və böyük müşaviri Conatan Urix “Katargate” istintaqı ilə əlaqədar həbs edilib.
Həbs qərarı israilli iş adamı Gil Bilgerin Qətərdə işləyən ABŞ vətəndaşından pulu Netanyahunun sözçüsü Feldşteynə ötürməsinin üzə çıxmasından sonra verilib.
"Katargate" istintaqı çərçivəsində həbs edilənlər "xarici agentlə əlaqə" və "çirkli pulların yuyulması" maddələri ilə ittiham olunurlar.
B.Netanyahu özü də baş verənlərlə əlaqədar prokurorluğa ifadə verməyə çağırılıb.
Netanyahunun ən yaxın adamları artıq məsuliyyətə cəlb olunur. Bu, baş nazirinin özünün də əməllərinə görə prokurorluğa çağırılması ehtimalını artırır. Növbə ona da çatacaq?
Mövzu ilə bağlı politoloq Qədir Aslan Crossmedia.az saytına açıqlama verib. O söyləyib ki, Netanyahu barədə artıq müvafiq qərar var: " Amma bunlar hələlik işlək qərarlar deyil. Eyni ilə Rusiya Prezidenti Vladimir Putin haqqında çıxarılan qərarlar kimi. Buna görə də Netanyahu öz başlatdığı prosesi davam etdirir. Bu, onun sonuncu dönəmidir və bunu özü də yaxşı bilir. O, bu prosesi axıra qədər aparacaq. Düşünmürəm ki, Netanyahu barəsində beynəlxalq cinayət axtarışı elan olunsun və ya bu istiqamətdə daha dərin addımlar atılsın. Əksinə, əsas missiya bitəndən, xüsusilə İran ilə bağlı planlarını həyata keçirdikdən sonra o, dünya tarixinə və ədəbiyyatına düşə bilər. Hətta İsrail baş nazirinin müəyyən mükafatlara layiq görülməsinə dair qərarlar verilə bilər. Tarixdə belə hallar tez-tez baş verib. Nəticə etibarilə biz Netanyahunun tarixdə şanlı və şöhrətli bir sərkərdə kimi qalmasını izləyəcəyik. Onun bütün ailəsi—atası, özü və qardaşı—bu işə həsr olunmuş insanlardır. Qardaşı Entebbe əməliyyatı zamanı dünyasını dəyişib. Netanyahunun ailəsi ömrünü bu işə həsr etmiş insanlardır və heç bir cinayət məhkəməsi və ya cinayət qərarı onu dayandıra bilməz".
Nuray Qurbanlı
16:02 01.04.2025
Oxunuş sayı: 8878
