Putin: "ABŞ-ın Qrenlandiya ilə bağlı ciddi planları var"
Rusiya prezidenti Vladimir Putin ABŞ-ın Qrenlandiya ilə bağlı atdığı addımların tarixi köklərə malik olduğunu vurğulayıb.
Crossmedia.az xarici KİV-ə istinadən xəbər verir ki, o, bu planların sadəcə yeni administrasiyanın şişirdilmiş siyasəti kimi qiymətləndirilməsinin yanlış olduğunu bildirib.
Putin bu fikirləri Murmanskda keçirilən Beynəlxalq Arktika Forumunda çıxışı zamanı səsləndirib. O, Arktika bölgəsində gedən proseslər və beynəlxalq münasibətlər kontekstində ABŞ-ın strategiyasına diqqət çəkib.
Rusiya lideri son 10 ildə Şimal Dəniz Yolu ilə daşımaların həcminin təxminən doqquz dəfə artdığını bildirib.
Onun sözlərinə görə, 2030-cu ildən etibarən bu marşrutla hər il 70-100 milyon ton yük daşınması planlaşdırılır.
Putin Qərb ölkələrinin Rusiyaya qarşı sərgilədiyi mövqenin Arktika regionunda əməkdaşlıq imkanlarını zədələdiyini bildirib. Bununla belə, Moskvanın heç kimi təhdid etmədiyini, lakin öz maraqlarını qorumaq üçün hər zaman hazır olduğunu vurğulayıb.
ABŞ-ın Qrenlandiya istiqamətində atdığı son addımları şərh edən Putin bu məsələnin tarixi köklərə dayandığını qeyd edib:
"Aydındır ki, ABŞ Arktika bölgəsindəki geostrateji, hərbi, siyasi və iqtisadi maraqlarını sistemli şəkildə prioritetləşdirməyə davam edəcək. Bu, Vaşinqtonun yeni rəhbərliyinin sadəcə şişirdilmiş siyasəti deyil, daha geniş və uzunmüddətli planlarının tərkib hissəsidir."
Putin, ABŞ və Qrenlandiya arasında baş verən proseslərin birbaşa Rusiyanı maraqlandırmadığını desə də, bu məsələyə diqqətlə yanaşdıqlarını da ifadə edib.
23:37 27.03.2025
Oxunuş sayı: 1441
