Evin yıxılsın məni qınayan, nə Fələstin, nə Suriya?! - Bura MELİSSA PARK-dır
Sosial şəbəkələrin birində lenti izlədiyim zaman qarşıma adamı dəhşətə gətirən bir videogörüntü çıxdı. Böyük ölçülü bir ekskavator kovuşu, içində insanlar olan evin pəncərəsini, divarını vurub dağıdır, qışqırtıya, bağırtıya baxmadan evi uçurur, insanları vahiməyə salır... Bu təsirli səhnədən çox pis oldum...
İlk baxışdan ağlıma gəldi ki, bura ya İsrail qoşunlarının nəzarətində olan Fəlsətindir ki, ərazidə “Allah evlərini yıxmışlar” hansısa yazığın evini yıxır, ya da Suriyadır, Əhməd əş-Şaraanın adamları Bəşər Əsədin yaramaz tərəfdarlarından qisas alırlar.
Diqqətlə baxanda gördüm ki, vay dədə, evin yıxılsın məni qınayan, nə Fələstin, nə Suriya?! Bura MELİSSA PARK-dır.
Qışqıranlar, evi dağıdılanlar isə MELİSSA PARK-ın amansızlığıyla üzləşmiş şəhər sakinlərimizdir.
Açığı inanmadım, dedim yooox bu qədər də olmaz!.. Heç kim günün günorta çağı Bakının ortasında, xalqımızın Novruz, Ramazan əhval-ruhiyyəsində olduğu bir vaxtda, səmənilər saralmamış, paxlava, şəkərbura qurtarmamış, rayona gedənlər hələ qayıtmamış cəmiyyətə qarşı bu qədər açıq hörmətsizlik edərək, belə bir özbaşınalığa, qanunsuzluğa yol verməz. Amma verdi, etdi, dağıtdı!...
Bilirsiniz, aydın məsələdir ki, belə söküntülər zamanı, tikinti şirkətlərindən “daha çox pul qopartmaq istəyən adam”lar olur. Bu isə ümumi işin gedişinə, böyük bir layihənin ləngiməsinə, yüzlərlə adamın aylarla əziyyət çəkməsinə səbəb olur. Mən bilmirəm bəlkə burada da buna bənzər hal var, bəlkə də yoxdur.
Ancaq məsələ onda deyil!
Məsələ ondadır ki, səbəb nə olursa olsun, sən kim olursansa ol, sənin arxanda kim dayanıbsa dayansın, bu söküntüyə, bu tikintiyə icazəni kimdən və necə alıbsansa al, günün günorta çağı Bakının ortasında bu qədər böyük bir özbaşınalığa yol verə bilməzsən. Yol verməməlisən!!!
....və belə bir siyasi əlamətdar gündə, xalqımızın böyük sevinc, qürur və həyacanla izlədiyi xəbərlər lentinə bilərəkdən ya bilməyərəkdən belə bir mənzərənin düşməsinə səbəbkar olmağın utancını isə ümid edirəm ki, hiss edəcəksiniz!...
Əlbəttə ki, mən ekskavator sürücüsünü nəzərdə tutmuram...
Miraj
09:38 28.03.2025
Oxunuş sayı: 5087
