Ermənistan həm "müharibə" deyir, həm "sülh" - Hansı olacaq?
Ermənistan parlamentin vitse-spikeri Ruben Rubinyan jurnalistlərə açıqlamasında deyib ki, müharibə təhlükəsi Ermənistan və Azərbaycan arasında sülh sazişi imzalanana qədər qalmağa davam edəcək.
"Müharibə təhlükəsi dünən var idi, sabah da olacaq. Lakin müharibə üçün səbəb və əsas yoxdur", - o qeyd edib.
Rubinyan vurğulayıb: "Biz sülhə doğru irəliləyirik".
"Sülh sazişinin mətni razılaşdırılıb və imzalanmağı gözləyir", - o əlavə edib.
R.Rubinyanın dedikləri əslində həm Ermənistanın siyasi elitasının şüurundakı ziddiyyətin təzahürü kimi də qiymətləndirilə bilər. Belə ki, rəsmi İrəvan bir tərəfdən sülhdən danışsa da, digər tərəfdən bu ritorikasını əməldə təsdiqləmir. İndi Rubinyanın səsləndirdiyi fikirlər də həmin ritorikanın təkrarıdır. Gah "müharibə" deyirlər, gah da "sülh". Deyəsən, Ermənistan heç özü də nə istədiyini bilmir.
Bu barədə Crossmedia.az-a danışan keçmiş xarici işlər naziri Elmar Məmmədyarov sülh sazişinin mətninin artıq razılaşdırıldığına diqqət çəkib: “İndi diqqət edilməli əsas məqam Ermənistan Konstitusiyasında əksini tapmış Azərbaycana qarşı ərazi iddialarıdır. Həmçinin Minsk Qrupunun ləğvi məsələsi də əsas məqamlardandır. Bu, kifayət qədər çətin məsələdir. Bakı və İrəvan Minsk Qrupunun ləğvi ilə ATƏR-ə birlikdə müraciət etməlidir. Amma konsensus əldə olunanda bəzi dövlətlər buna qarşı çıxa bilər. İndi bu məsələlərlə bağlı danışıqlar olmalıdır. Eskalasiyanın başlayacağına isə inanmıram. Bu variantı demək olar, istisna edirəm".
Nəzrin Salmanova
14:47 27.03.2025
Oxunuş sayı: 10300
