"Qarabağ hərəkatı Ermənistan hakimiyyəti üçün təhlükə yaradır"- Deputat
Ermənistanın baş naziri Nikol Paşinyan hökumətin hesabatlarının müzakirəsi zamanı Qarabağ hərəkatının erməni dövlətçiliyinə mane olmaq üçün istifadə edildiyini bildirib. O, bu hərəkatın davam etməməli olduğunu vurğulayıb. Paşinyan həmçinin, Qarabağ hərəkatından imtina edildiyi təqdirdə ATƏT-in Minsk qrupunun buraxılması məsələsinin də müzakirə oluna biləcəyini qeyd edib.
Paşinyanın dediklərindən belə qənaətə gəlmək olar ki, artıq Ermənistan Qarabağdan tamamilə imtina edir və tarixi səhvlərini boyunlarına alır.
Bu barədə Crossmedia.az-a açıqlama verən Milli Məclisin deputatı Nəsib Məhəməliyev nə qədər ki, Qarabağ ideologiyası Ermənistan cəmiyyətində gündəmdə saxlanılır, bunun Ermənistan dövlətçiliyi üçün təhlükə olduğunu bildirib: "Kimsə saxta ideologiyanı qəbul edə bilməz. Reallıqda da vəziyyət 44 günlük müharibədən sonra tamamilə dəyişib. Nə qədər ki, separatçılıq meyilləri güclənir, bu, Ermənistan dövləti üçün təhlükədir".
Qeyd olunanların Paşinyan üçün də böyük təhlükə yaratdığını qeyd edən N. Məhəməliyev bunun səbəbini belə izah edib: "Çünki Qarabağ hərəkatının aparıcı qüvvələri və pərdəarxası gücləri keçmiş "Miatsum" təşkilatının nümayəndələridir və onlar öz ideyaları əsasında hakimiyyətə gəlmiş kriminal Qarabağ klanıdır. Onlar öz şəxsi mənafeləri üçün bu ideologiyadan istifadə edirlər və Paşinyanı hakimiyyətdən kənarlaşdırmaq məqsədi güdürlər. Ona görə də Qarabağ ideologiyasının gündəmdə saxlanması və təbliğ olunması həm Ermənistan dövlətçiliyi, həm də Paşinyanın hakimiyyəti üçün bir təhlükədir".
Millət vəkili hesab edir ki, bu ideologiyanın heç bir perspektivi yoxdur: "Ermənistan cəmiyyəti bunu nə qədər tez başa düşəcək, bölgəyə də o qədər tez sülh girəcək".
Fatimə Məmmədova
13:10 27.03.2025
Oxunuş sayı: 1693
