Türkiyədə yaşayan soydaşımız aksiyalardan danışdı: "Tələbələr dərsləri boykot edir"
Türkiyənin xüsusilə İstanbul və Ankarada hökumət əleyhinə genişmiqyaslı etiraz aksiyaları keçirilir. Bu nümayişlər İstanbul Böyükşəhər Bələdiyyəsinin sədri Əkrəm İmamoğlunun martın 19-da həbs edilməsindən sonra başlayıb və ölkənin müxtəlif şəhərlərinə yayılıb. Etirazçılar İmamoğlunun həbsini yanlış və ədalətsiz hesab edərək, bu addımı Prezident Rəcəb Tayyib Ərdoğanın idarəçiliyinə qarşı bir etiraz kimi qiymətləndirirlər. Etiraz aksiyasına təkcə Türkiyə vətəndaşları deyil, həm də digər ölkələrdən qoşulanlar var.
Hazırda Ankarada təhsil alan soydaşımız Ayan Rzayeva Crossmedia.az-a açıqlamasında Türkiyənin digər şəhərlərində olduğu kimi paytaxtda da etiraz aksiyalarının davam etdiyini bildirib.
"Şəhərin müxtəlif yerlərində polis barikadalar qurub. Bəzi yerlərdə ictimai nəqliyyatın fəaliyyəti axşam saat 19:00-dan sonra dayandırılır. Buna baxmayaraq, etirazçılar piyada şəkildə küçələrdə toplaşmağa davam edirlər".
A.Rzayeva nümayişlərin təkcə şəhər meydanları və əsas küçələrlə məhdudlaşmadığını, universitetlərdə də tələbələrin fəal şəkildə aksiyalara qoşulduğunu qeyd edib.
"Tələbələr yürüşlər və oturaq aksiyalar keçirir. Hətta bəzi yerlərdə dərslər də boykot edilib".
Fatimə Məmmədova
11:42 27.03.2025
Oxunuş sayı: 6438
