Sensasiya: Rusiya uzunmüddətli müharibəyə hazırlaşır, Ukrayna ilə bağlı sülh gündəmdə deyil
Rusiya hakimiyyəti Ukraynada müharibəni bitirmək üçün real sülh danışıqları aparmaq niyyətində deyil və bunun əvəzinə ABŞ-lə ikitərəfli münasibətlərə üstünlük verir.
Crossmedia.az xəbər verir ki, bu barədə ABŞ-nin Müharibə Araşdırmaları İnstitutunun analitikləri hesabat yayıb.
Hesabatda bildirilir ki, Kreml Ər-Riyadda keçirilən ABŞ-Ukrayna və ABŞ-Rusiya görüşləri fonunda Ukraynaya beynəlxalq dəstəyi zəiflətməyə çalışır. Rusiya xarici işlər naziri Sergey Lavrov Ukraynanı "nəzarət altında olan nasistlər" adlandıraraq, Moskvanın "denasifikasiya" tələbinin – yəni Kiyevdə Rusiyaya bağlı hökumət qurmaq istəyinin – əsaslandırılmasına cəhd edib. Lavrov eyni zamanda, Avropa ölkələrini müharibəni uzatmaqda günahlandıraraq, bunun Avropa ilə ABŞ arasında fikir ayrılığı yaratmaq məqsədi daşıdığını iddia edib.
Qeyd edək ki, Rusiya prezidentinin mətbuat katibi Dmitri Peskov isə Ukraynanın enerji obyektlərinə hücumları dayandırmaqla bağlı təklif olunan moratoriumu pozduğunu iddia edib. Halbuki Ər-Riyadda aparılan danışıqlar hələ yekunlaşmayıb və razılaşmalar rəsmi olaraq qüvvəyə minməyib. Kreml sözçüləri, o cümlədən Rusiya Xarici İşlər Nazirliyinin nümayəndəsi Mariya Zaxarova, ictimaiyyəti danışıqlardan böyük gözləntiləri olmamağa hazırlayırlar.
Analitiklər bildirirlər ki, Kreml Ukraynada uzunmüddətli müharibəyə hazırlaşır və ölkə daxilində cəmiyyəti buna alışdırmağa çalışır. Hazırkı danışıqlar Moskvanın əsas məqsədlərinə xidmət etmir və Kreml yalnız ABŞ-lə münasibətləri tənzimləməyə üstünlük verir.
Xumar Emilqızı
12:20 26.03.2025
Oxunuş sayı: 1149
