Gürcüstan və Aİ birlikdə yaşamağı öyrənməlidir – XİN
Gürcüstan və Avropa İttifaqı (Aİ) birlikdə yaşamağı öyrənməli və ciddi dialoq aparmalıdır.
Crossmedia.az bildirir ki, bu fikirləri Gürcüstanın xarici işlər naziri Maka Boçorişvili yerli mediaya açıqlamasında səsləndirib.
Nazirin sözlərinə görə, Gürcüstan Aİ-yə üzvlüklə bağlı geniş müzakirələrə ehtiyac duyur:
"Avropa İttifaqı Gürcüstan üçün əsas istiqamətdir. Bu, bizim görmək istədiyimiz yerdir. Biz Qərb dövlətləri ilə ayaqlaşmaq, NATO və Aİ-nin üzvü olmaq istəyirik. Hazırda hər iki qurumla sıx əməkdaşlıq edirik. Gürcüstan NATO üzvü olmayan ölkələr arasında Əfqanıstandakı sülhməramlı missiyalara ən çox töhfə verən dövlət olub. 2014-cü ildən Aİ-nin assosiativ tərəfdaşıyıq və Dərin və Hərtərəfli Azad Ticarət Sazişi çərçivəsində Avropa bazarına inteqrasiya imkanımız var".
Boçorişvili vurğulayıb ki, son illərdə həyata keçirilən islahatlar sayəsində Gürcüstan Aİ-nin digər tərəfdaş ölkələrini qabaqlayır və korrupsiya ilə mübarizə, açıq idarəçilik və biznes mühiti sahələrində beynəlxalq reytinqlərdə yüksək mövqelərə sahibdir.
Həmçinin Xarici işlər naziri əlavə edib ki, Avropa İttifaqı Gürcüstan üçün təkcə tərəfdaş deyil, həm də təhlükəsizliyin təminatçısıdır.
Fatimə Məmmədova
22:27 19.03.2025
Oxunuş sayı: 713
