İsrail Azərbaycan vasitəsilə Avropaya qaz ixrac edə bilər
İsrail Azərbaycanın qaz infrastrukturu vasitəsilə Avropaya qaz tədarük edə bilər.
Crossmedia.az xəbər verir ki,bu barədə İsrailin Energetika Nazirliyinin mühəndislik və yoxlama şöbəsinin keçmiş direktoru Viktor Barjudin məlumat verib.
Onun sözlərinə görə, bu məsələ beynəlxalq siyasi vəziyyətdən asılı olacaq, lakin iki ölkə arasındakı yüksək səviyyəli enerji əməkdaşlığı bu variantın mümkünlüyünü artırır.
“Azərbaycanın logistik imkanlarından, xüsusilə də Cənub Qaz Dəhlizinin Türkiyə hissəsindən istifadə etmək mümkündür. Əgər beynəlxalq şərait buna imkan versə, bu, reallaşa bilər”,– o bildirib.
Həmçinin qeyd edək ki, İsrail və Azərbaycan arasında müxtəlif sahələrdə – yüksək texnologiyalar, kənd təsərrüfatı, “yaşıl enerji” və su ehtiyatlarının idarə edilməsi sahələrində geniş əməkdaşlıq potensialı mövcuddur. Xüsusilə, su qıtlığının aradan qaldırılması və dəniz suyunun duzsuzlaşdırılması kimi məsələlərdə əməkdaşlıq mümkündür.
Barjudin Azərbaycanın neft-qaz sənayesində yüksək inkişaf səviyyəsinə malik olduğunu və bu sahədə peşəkar mütəxəssislərə sahib olduğunu vurğulayıb.
“Azərbaycan və İsrail qarşılıqlı hörmət və dəstək prinsipləri əsasında unikal münasibətlər qurub. İki ölkə arasında əməkdaşlıq müxtəlif sahələrdə daha da inkişaf edə bilər,” – deyə o əlavə edib.
Fidan Xəlilova
16:22 18.03.2025
Oxunuş sayı: 806
