Aİ Suriyaya 2,5 milyard avro yardım ayıracaq
Avropa İttifaqı (Aİ) Suriyaya qarşı sanksiyaların yumşaldılması siyasətini davam etdirir və ölkəyə 2,5 milyard avro yardım ayıracağını açıqlayıb.
Crossmedia.az xəbər verir ki, Aİ Komissiyasının sədri Ursula von der Leyen Brüsseldə keçirilən konfransda Suriyaya humanitar və iqtisadi dəstəyin artırılacağını bildirib.
"Avropa İttifaqı 2025 və 2026-cı illər üçün Suriyada və bölgədə yaşayan suriyalılara 2,5 milyard avro ayıracaq" – deyə von der Leyen vurğulayıb.
Yardımların bölgədə yaşayan qaçqınlara, xüsusilə İordaniya, Livan, İraq və Türkiyədəki suriyalılara da şamil ediləcəyi qeyd edilib. Almaniya isə Suriyanın sülh yolu ilə yenidən qurulması üçün 300 milyon avro ayıracağını açıqlayıb. Bu vəsait humanitar yardım, vətəndaş cəmiyyətinə və təhsil sisteminə dəstək üçün nəzərdə tutulub.
Aİ-nin Xarici Əlaqələr və Təhlükəsizlik Siyasəti üzrə Ali Nümayəndəsi Kaya Kallas zorakılıqları dayandırmaq üçün insanlara ümid verməyin vacib olduğunu bildirib.
O, bank xidmətlərinə çıxışın təmin edilməsi, maaşların ödənilməsi və investisiyaların təşviq edilməsinin Suriyada sabitliyə töhfə verəcəyini vurğulayıb.
Bununla yanaşı, Aİ Suriyaya qarşı sanksiyaların ləğvini tam nəzərdən keçirməsə də, enerji, nəqliyyat və bank sektorlarına tətbiq edilən məhdudiyyətlərin aradan qaldırılması üçün addımlar atılacağını bəyan edib. Bu qərarın ölkənin iqtisadi dirçəlişini sürətləndirmək və sabitliyi təmin etmək məqsədi daşıdığı bildirilib.
23:13 17.03.2025
Oxunuş sayı: 691
