Berbok: "Avropa, Suriya xalqının yanındadır və inklüziv sülh prosesini dəstəkləyir"
Almaniyanın xarici işlər naziri Annalena Berbok bildirib ki, avropalılar Suriya xalqının və azad Suriyanın yanındadır.
Crossmedia.az Anadolu Agentliyinə istinadən xəbər verir ki, Berbok, Brüsseldə keçirilən Aİ Xarici İşlər Nazirləri Toplantısından əvvəl mətbuata açıqlamalar verib. Berbok, toplantıda müzakirə olunacaq əsas mövzulardan birinin Suriya olacağını bildirərək, "Avropalılar olaraq biz Suriya xalqının və azad Suriyanın yanındayıq", – deyə vurğulayıb.
Berbok, Suriyada hər kəsin iştirak etdiyi hərtərəfli bir prosesi gözlədiklərini bildirərək, ölkəsinin Birləşmiş Millətlər və müəyyən qurumlar vasitəsilə suriyalılara 300 milyon avro ayıracağını qeyd edib.
Suriyanın dinc gələcəyinin yalnız inklüziv (hərtərəfli) siyasi proseslə mümkün ola biləcəyini vurğulayan Berbok bunları deyib: “Yüzlərlə mülki şəxsə qarşı törədilmiş dəhşətli cinayətlərin keçid hökuməti tərəfindən hərtərəfli araşdırılması və günahkarların ədalət qarşısına çıxarılması təmin edilməlidir. Bununla yanaşı, keçid hökuməti təhlükəsizlik aparatındakı müxtəlif aktorlar üzərində nəzarətə sahib olmalıdır. Kürdlərin dövlət və təhlükəsizlik strukturlarına inteqrasiyası, vahid Suriya yolunda atılacaq son dərəcə vacib bir addımdır. Çünki yalnız inklüziv siyasi proses uzunmüddətli sülhü, təhlükəsizliyi və dolayısıyla da sabitliyi təmin edə bilər.”
Berbok, Suriyadakı konstitusiya bəyannaməsinin keçid dövründəki hüquqi boşluğu doldurmasının vacibliyini vurğulayaraq, “Prezidentə verilmiş bu son dərəcə güclü rol, Suriyadakı bütün insanlar üçün məsuliyyətli və hərtərəfli şəkildə istifadə edilməlidir. Bu, tarixi bir fürsətdir, nəhəng bir vəzifədir və son dərəcə incə bir balans tələb edir”, – deyə fikrini bölüşüb.
Güclü və suveren Ukrayna hədəfi
Almaniyanın xarici işlər naziri, eyni zamanda güclü və suveren Ukraynanın hədəfləri arasında olduğunu vurğulayıb.
Bunu reallaşdırmaq üçün Ukraynanın müdafiə qabiliyyətini gücləndirməyin, eyni zamanda hərbi dəstək təmin etmək üçün Aİ dövlət və hökumət başçıları səviyyəsində sürətli qərarlar qəbul etməyin vacibliyini qeyd edən Annalena Berbok, Avropanın təhlükəsizliyinə edilən investisiyaların Ukraynanın, transatlantik təhlükəsizliyin və transatlantik əlaqələrin güclənməsinə sərmayə qoymaq anlamına gəldiyini bildirib.
Pərvin Hacıyeva
16:16 17.03.2025
Oxunuş sayı: 10145
