ABŞ-da media xaosu: jurnalistlər işdən çıxarıldı, yayım dayandırıldı
ABŞ-da Donald Trampın hakimiyyətə gəldikdən sonra federal qurumlarda apardığı ixtisarlar indi mediaya da sirayət edib. Tramp cümə günü Amerikanın Səsi və digər hökumət tərəfindən maliyyələşdirilən KİV-lərin bağlanmasını nəzərdə tutan sərəncam imzalayıb.
Bu qərar ABŞ Qlobal Media Agentliyi (USAGM) və onun tabeliyində olan Azad Avropa/Azadlıq Radiosu, Azad Asiya Radiosu və digər beynəlxalq yayımçılara təsir edib. Təxminən 270 milyon dollar büdcəsi və 2000-dən çox əməkdaşı olan təşkilat 49 dildə yayımlanır və həftəlik 361 milyon auditoriyaya malikdir.
Jurnalistlər işsiz qaldı, yayımlar dayandırıldı
NPR xəbər verir ki, New York Times daxili yazışmalara əsasən, Amerikanın Səsinin 1300-dən çox əməkdaşının inzibati məzuniyyətə göndərildiyini və bunun beynəlxalq yayım orqanının dağılmasına gətirib çıxardığını yazıb.
Amerikanın səsinin direktoru Maykl Abramovitz bu vəziyyəti belə şərh edib:
“83 ildə ilk dəfə məşhur Amerikanın səsinin susdurulması məni çox kədərləndirdi.”
Crossmedia.az xarici mediaya əsasən bildirir ki, İlon Maskın dəstəklədiyi DOGE təşəbbüsü USAGM-in maliyyə və sosial media fəaliyyətlərinə müdaxilə edib. Hətta Azad Avropa və Azad Asiya Radiosunun əməkdaşlarının maaşlarının 30 gün müddətinə saxlandığı bildirilir.
Ötən ay DOGE-də çalışan bir qrup gəncin Xəzinə Nazirliyi və digər dövlət qurumlarına basqın edərək işçiləri qovduğu və istifadəçi məlumatlarına icazəsiz daxil olduğu iddia edilirdi. Hazırda USAGM-in bağlanması Maskın Azad Asiya Radiosuna araşdırma başlatmasından bir neçə gün sonraya təsadüf edir.
Zəhra Ağayeva
09:14 17.03.2025
Oxunuş sayı: 644
