Zelenski Rusiyanın planlarını açıqladı: “Qoşunlarımızı mühasirəyə almaq istəyirlər”
Rusiya Kursk vilayəti istiqamətindən Ukraynaya daxil olmaq və Ukrayna Silahlı Qüvvələrini mühasirəyə almaq üçün qüvvələr toplayır.
Crossmedia.az UNİAN-a istinadən xəbər verir ki, bu barədə Ukrayna Prezidenti Volodimir Zelenski deyib.
O bildirib ki, Kreml rəhbəri Vladimir Putinin Ukrayna ordusunun Kursk vilayətində mühasirəyə düşməsi ilə bağlı iddiaları həqiqətə uyğun deyil.
"Ukrayna ordusunun Kursk vilayətində mühasirəyə düşməsi ilə bağlı yayılan məlumatlar yalandır", – deyə Zelenski vurğulayıb.
Bununla yanaşı, Ukrayna lideri Rusiya tərəfindən yayılan məlumatlara reaksiya verib: " Rusiya Ukrayna hərbçilərini mühasirəyə almaq istəyir, amma bunu Ukrayna ərazisində etmək niyyətindədir. Rusiya Ukraynada mövcudluğunu maksimum artırmaq istəyir. Ukrayna hərbi komandanlığı və qoşunlar Rusiya ordusunun planlarından xəbərdardır və bu istiqamətdə tədbirlər görülür. Biz onların bunu harada etməyə çalışdığını aydın bilirik. Onlar, təbii ki, Ukrayna ərazisində maksimal mövcudluq istəyirlər. Burada yeni heç nə yoxdur”.
Qeyd edək ki, o, həmçinin beynəlxalq tərəfdaşlara çağırış edərək, Rusiyanın qüvvə toplayaraq hansı istiqamətə yönləndiyini peyk görüntüləri və kəşfiyyat məlumatları əsasında qiymətləndirməyə çağırıb: "Tərəfdaşlarımız və müttəfiqlərimiz kəşfiyyat məlumatlarına və peyk görüntülərinə baxsalar, Rusiyanın qüvvələrini harada topladığını və hansı istiqamətə yönəltdiyini görəcəklər. Bu, çox vacib məqamdır. O zaman aydın olacaq ki, söhbət sülhdən getmir", – deyə Zelenski vurğulayıb.
Xumar Əhmədova
18:51 16.03.2025
Oxunuş sayı: 637
