Zelenski: "Rusiya Ukraynanın NATO-ya üzvlüyü ilə bağlı qərar verə bilməz"
"Ukraynanın təhlükəsizlik zəmanətləri müttəfiqlər tərəfindən təmin edilməlidir və beynəlxalq tərəfdaşlar güclü Ukrayna ordusunun mövcudluğunda maraqlıdırlar".
Crossmedia.az UNIAN-a istinadən xəbər verir ki, bunu ölkə prezidenti Volodimir Zelenski deyib.
O bildirib ki, Rusiya NATO-ya üzvlüklə bağlı qərarlara təsir etmək və ya veto qoymaq hüququna malik deyil.
"Hər kəs ümid edir ki, Ukrayna Avropa, ABŞ və digər müttəfiqlərdən təhlükəsizlik zəmanətləri alacaq. Müxtəlif formatlar müzakirə olunur. Bəziləri NATO-nun və ya beynəlxalq kontingentin iştirakını mümkün hesab edir, digərləri isə NATO-nun 5-ci maddəsinin daha güclü təminat olduğunu düşünür", – deyə Zelenski bildirib.
Onun sözlərinə görə, NATO-ya üzvlüklə bağlı qərar yalnız Alyansın müttəfiqlərindən asılıdır və Rusiya bu məsələyə müdaxilə edə bilməz: "Biz anlayırıq ki, NATO və ya digər təhlükəsizlik formatları ilə bağlı qərar alyans müttəfiqlərinin iradəsindən asılıdır, lakin bu, qətiyyən Rusiyanın istəkləri, baxışları və xüsusilə də onun vetosu ilə müəyyən edilə bilməz".
Zelenski əlavə edib ki, Rusiya NATO-ya təsir etmək üçün heç bir hüquqi səlahiyyətə malik deyil: "Onlara belə bir fürsət vermək lazım deyil".
Bundan əlavə, Zelenski Ukraynanın yaxın müttəfiqlərindən müsbət siqnalların gəldiyini bildirib. O qeyd edib ki, Ukrayna ordusunun gücləndirilməsi məsələsi təkcə ölkənin deyil, bütövlükdə Avropanın təhlükəsizliyi üçün vacibdir.
"Bütün tərəfdaşlar güclü və döyüş qabiliyyətli Ukrayna ordusunda maraqlıdır. Biz ordunu saxlamaq və gücləndirmək üçün müştərək fəaliyyət göstərməliyik. Çqnki bu, Ukraynanın təkbaşına yerinə yetirə biləcəyi bir məsələ deyil – bu, ciddi maliyyə yüküdür", – deyə o əlavə edib.
Xumar Əhmədova
12:45 16.03.2025
Oxunuş sayı: 1805
