Türkiyə rəsmisi: Ukrayna münaqişəsinin həlli danışıqlarında 25% ərazi müzakirə edilir
Türkiyə Prezidentinin xarici siyasət və təhlükəsizlik məsələləri üzrə baş müşaviri Akif Çağatay Kılıç Ukrayna münaqişəsinin həlli ilə bağlı aparılan danışıqlarda Ukrayna ərazisinin 25%-nin müzakirə edildiyini bildirib.
Crossmedia.az NTV-ə istinadən xəbər verir ki, Kılıçın sözlərinə görə, münaqişə ilə bağlı vəziyyət sürətlə dəyişir və razılaşmalar mütəmadi olaraq yenidən nəzərdən keçirilir. “Bəzi məsələlərdə irəliləyiş əldə olunur, lakin sonra onlar yenidən gözdən keçirilir. Əsas problem etimadsızlıqdır. Heç kim bir-birinə güvənmir. 2022-ci ildən etibarən tərəflər iki dəfə Türkiyədə görüşüblər və o zaman ciddi irəliləyiş əldə edilmişdi. Lakin dünya siyasətində artıq olmayan bəzi şəxslərin qərarları nəticəsində müharibə davam etdi”, – deyə müşavir bildirib.
O, əlavə edib ki, danışıqlarda Ukrayna ərazisinin nə qədərinin müzakirəyə çıxarıldığı dəyişir: “Əgər 2022-ci ildə söhbət 3%-dən gedirdisə, indi bu rəqəm 25%-ə çatıb”.
Kılıç vurğulayıb ki, tərəflər arasında razılığın əldə olunmasına dair ümumi fikir mövcuddur: “Bu müharibənin başa çatması zəruridir. Ukrayna ağır itkilər verir, Rusiya çətinliklərlə üzləşir. ABŞ və Avropa isə bu prosesdə öz mövqeyini müəyyənləşdirməyə çalışır. Hazırda vəziyyətdən çıxış yolu axtarılır. Liderlərin göstərişi ilə nümayəndə heyətləri danışıqları davam etdirir. Yekun qərarlar dövlət başçılarının birbaşa görüşü zamanı qəbul ediləcək, lakin buna qədər ciddi hazırlıq işi görülməlidir”, – deyə Türkiyə rəsmisi bildirib.
Mədinə Cəlilova
14:08 15.03.2025
Oxunuş sayı: 11248
