Qırğızıstanda məktəblər 12 illik təhsilə keçir
Qırğızıstan hökuməti ölkə məktəblərində 12 illik təhsil sisteminə keçid qərarını təsdiqləyib. Yeni sistem 2025-ci ilin sentyabr ayından etibarən tətbiq ediləcək.
Crossmedia.az xəbər verir ki, yeni təhsil standartına əsasən, məktəb təhsili üç mərhələyə bölünəcək: İbtidai ümumi təhsil 1-6-cı siniflər, əsas ümumi təhsil 7-9-cu siniflər, orta ümumi təhsil 10-12-ci siniflər
Bundan əlavə, qiymətləndirmə sistemində də dəyişikliklər olacaq. 1-3-cü siniflərdə qiymətsiz qiymətləndirmə tətbiq ediləcək, 4-cü sinifdən başlayaraq ballı sistemə keçid ediləcək. 7-12-ci siniflərdə isə şagirdlərin özünü qiymətləndirmə bacarıqlarını artırmaq məqsədilə meyar əsaslı qiymətləndirmə aparılacaq.
Məzunların yekun qiymətləndirilməsi profil fənlərinə əsaslanacaq və peşə təhsili müəssisələrinə qəbul prosesinə təsir göstərəcək.
Yeni sistemə uyğun olaraq, 2025-ci ildən məktəbə qəbul yaş həddi də dəyişəcək. Belə ki, altı yaşlı uşaqlar birinci sinfə qəbul ediləcək, yeddi yaşlı uşaqlar isə birbaşa ikinci sinfə yerləşdiriləcək.
Bu dəyişikliklər təhsilin keyfiyyətini artırmaq və beynəlxalq standartlara uyğunlaşdırmaq məqsədi daşıyır.
Mədinə Cəlilova
13:25 15.03.2025
Oxunuş sayı: 9706
