Nilsen ABŞ-nin Qrenlandiya ilhaqına qarşı çıxdı
Qrenlandiyada keçirilən seçkilərdə qalib gələn Demokratlar Partiyasının lideri Yens-Frederik Nilsen ABŞ prezidenti Donald Trampın adanın ilhaq ediləcəyi ilə bağlı açıqlamalarının "qəbuledilməz" olduğunu bildirib.
Qrenlandiyadakı seçkilərdə səslərin 29,9 faizini toplayaraq parlamentdə üstünlük qazanan müxalifət partiyası “Demokraatit”in lideri Nilsen Facebook hesabında açıqlama verib.
ABŞ Prezidenti Trampın Qrenlandiyanın ilhaqına dair sözlərini “qəbuledilməz” adlandıran Nilsen vurğulayıb: “Trampın bu açıqlaması, belə məqamlarda birliyimizin vacibliyini bir daha sübut edir.”
Crossmedia.az Anadolu Agentliyinə istinadən xəbər verir ki, Nilsen təmsil etdiyi partiyanın "birlik ruhu" ilə hökumət qurmaq üçün digər partiyalarla danışıqlara başlayacağını bildirib və ABŞ ilə münasibətlərdə praqmatik yanaşmanın vacibliyini vurğulayıb.
Seçkidə qalib gəldikdən sonra Sky News-a açıqlama verən Nilsen bildirib: "Biz nə ABŞ vətəndaşı, nə də danimarkalı olmaq istəyirik. Biz qrenlandiyalı olaraq qalmaq istəyirik. Gələcəkdə öz müstəqilliyimizi əldə etməyi arzulayırıq. Ölkəmizi isə Trampın gözləntiləri ilə deyil, öz gücümüzlə qurmaq niyyətindəyik."
Müstəqillik müzakirələrinin davam etdiyi Qrenlandiyada həftə ərzində keçirilən seçkilərdə müxalifət partiyası “Demokraatit” səslərin 29,9 faizini toplayaraq parlamentdə üstünlük qazanmışdı.
Tramp dünən Qrenlandiyanın ABŞ tərəfindən ilhaq edilə biləcəyi ilə bağlı suala belə cavab verib: "Düşünürəm ki, bu baş verəcək. Bu məsələdə bir razılaşma əldə etməliyik, çünki Danimarka bunu edə bilmir. Danimarka ilə danışıqlar aparırıq. Milli təhlükəsizliyimiz üçün buna həqiqətən ehtiyacımız var."
Digər tərəfdən, Avropa İttifaqı (Aİ) Komissiyasının sözçülərindən Anitta Hipper Qrenlandiyaya tam dəstək verdiklərini və milli suverenlik, ərazi bütövlüyü, sərhədlərin toxunulmazlığı prinsiplərini, eləcə də Birləşmiş Millətlər Təşkilatının Nizamnaməsini müdafiə etməyə davam edəcəklərini bildirib.
Pərvin Hacıyeva
12:18 15.03.2025
Oxunuş sayı: 9853
