İsrail HƏMAS-dan girovların azad olunmasını tələb edir
İsrail Qəzzada atəşkəsin davam etməsi üçün HƏMAS-dan 11 girovun azad edilməsini və 16 girovun cəsədinin təhvil verilməsini tələb edib.
Crossmedia.az xəbər verir ki, bu barədə “Al Jazeera” kanalı HƏMAS-dakı mənbəyə istinadən məlumat yayıb.
Belə ki, HƏMAS vasitəçilərə ABŞ vətəndaşlığı olan bir girovu azad etməyə və ikiqat vətəndaşlığı olan dörd girovun cəsədini təhvil verməyə hazır olduğunu bildirib. HƏMAS-ın nümayəndəsi Hazem Qasım bunun danışıqları irəlilətmək üçün “müsbət addım” olduğunu, lakin əsas razılaşmaların dəyişdirilməyəcəyini vurğulayıb.
Martın 12-də Dohada Qətərin vasitəçiliyi və ABŞ rəsmilərinin iştirakı ilə İsrail və HƏMAS arasında yeni qeyri-birbaşa danışıqlar mərhələsi başlayıb.
Xatırladaq ki, yanvarın 15-də tərəflər girovların azad edilməsi və Qəzzada atəşkəsin təmin edilməsi ilə bağlı razılığa gəliblər. Razılaşma 19 yanvarda qüvvəyə minib və üç mərhələdən ibarət olub. Birinci mərhələ martın 1-də başa çatıb. Bu müddətdə 33 israilli girov, o cümlədən ölənlər İsrailə qaytarılıb, müqabilində isə 1,5 mindən çox fələstinli məhbus azad edilib, bəziləri Fələstin ərazilərindən kənara deportasiya olunub.
Fatimə Məmmədova
11:30 15.03.2025
Oxunuş sayı: 9813
