ABŞ-dən HƏMAS-a sərt xəbərdarlıq: Girovları azad etməsəniz...
ABŞ administrasiyası Fələstinin "HƏMAS" hərəkatına xəbərdarlıq edərək, girovların azad edilməməsi halında ciddi nəticələrlə üzləşəcəyini bildirib.
Crossmedia.az xarici mediaya istinadən xəbər verir ki, Ağ Ev bu məsələ ilə bağlı rəsmi bəyanat yayıb.
Belə ki, ABŞ-nin Yaxın Şərq üzrə xüsusi nümayəndəsi Stiv Vitkoff və Milli Təhlükəsizlik Şurasının Yaxın Şərq və Şimali Afrika üzrə baş direktoru Erik Treyqer Dohada keçirilən görüş zamanı atəşkəs rejiminin Ramazan və Pasxa bayramlarından sonra da davam etməsi təklif irəli sürüblər.
Bəyanata görə, yeni təklif çərçivəsində HƏMAS əvvəlki razılaşmalara uyğun olaraq məhbus mübadiləsinə razılıq verməli və girovların azad olunmasına şərait yaratmalıdır. Bu addım, eyni zamanda, humanitar yardımın bərpasını və münaqişənin həlli üçün uzunmüddətli atəşkəsin təmin olunmasını hədəfləyir.
Ağ Ev rəsmiləri bildiriblər ki, bu plan mümkün qədər tez həyata keçirilməli və ABŞ-İsrail vətəndaşı Edan Aleksandrın dərhal azad edilməsi təmin olunmalıdır.
"HƏMAS vaxtın öz tərəfində olduğunu düşünməklə səhv edir"
Ağ Ev rəsmiləri HƏMAS-ın vəziyyəti uzatmaq cəhdlərinin uğursuz olacağını bəyan ediblər:
"HƏMAS elə düşünür ki, zaman onun tərəfindədir. Amma belə deyil! HƏMAS son tarixdən xəbərdardır və bilməlidir ki, müddət keçərsə, biz də buna uyğun cavab verəcəyik".
Bu açıqlama Vaşinqtonun HƏMAS-a qarşı təzyiqləri artıraraq girovların tezliklə azad olunmasına nail olmaq niyyətini açıq şəkildə nümayiş etdirir.
ABŞ administrasiyasının məsələ ilə əlaqədar hansı addımlar atacağı isə qarşıdakı günlərdə aydın olacaq.
Aybəniz Səfərova
00:34 15.03.2025
Oxunuş sayı: 13645
