Trampın “sağ əli” Bakıda: ABŞ, İsrail və Azərbaycan arasında strateji əməkdaşlıq güclənir
ABŞ-nin prezidenti Donald Trampın xüsusi nümayəndəsi Stiv Vitkoff Bakıya səfər edib. Onun bu səfəri İsrailin Baş naziri Benyamin Netanyahunun Knessetdə üçtərəfli tərəfdaşlığa sadiqliyini vurğulayan bəyanatından və yüksək rütbəli ravvinlərin Trampa ünvanladığı dəstək məktubundan sonra baş tutub.
Crossmedia.az xəbər verir ki, bu barədə “Yerusəlim Post” məlumat yayıb.
Qeyd edək ki, məlumata görə, Vitkoff cümə günü səhər saatlarında Moskvadan Bakıya gəlib. Onun təyyarəsi Moskvanın Vnukovo hava limanından gecə saat 02:00-da havaya qalxıb və bir neçə saat sonra Azərbaycanın paytaxtına enib. Kremlin bu görüşlə bağlı rəsmi açıqlama verməməsinə baxmayaraq, bəzi mənbələr Vitkoffun Rusiya prezidenti Vladimir Putinlə qapalı görüş keçirdiyini iddia edir.
Bildirək ki, ekspertlər hesab edirlər ki, Azərbaycanın qlobal diplomatiyada rolu getdikcə artır. Təxminən iki ay əvvəl Begin-Sadat Strateji Araşdırmalar Mərkəzi Bakının Vaşinqton və Moskva arasında vasitəçi kimi çıxış edə biləcəyini bildirən analiz yayımlamışdı.
Məlumata görə Vitkoffun Moskva səfərindən dərhal sonra Bakıya gəlməsi Azərbaycanın bu prosesdə mühüm rol oynaya biləcəyinə dair fikirləri gücləndirir. Diplomatik dairələr artıq Bakıda baş verən hadisələri yaxından izləyir və ABŞ, İsrail və Azərbaycan arasındakı üçtərəfli əməkdaşlığın gələcək inkişafını diqqətlə təhlil ediblər.
Xatırladaq ki, daha əvvəl Crossmedia.az Vitkofun Bakıda olması barədə xəbər dərc etmişdi.
Xumar Əhmədova
20:05 14.03.2025
Oxunuş sayı: 722
