Uber-in keçmiş CEO-su: “Avtonom sürücülük layihəsinin dayandırılması səhv idi”
Uber-in keçmiş baş icraçı direktoru Travis Kalanick şirkətin avtonom avtomobil proqramını ləğv etməsinin səhv qərar olduğunu bildirib.
O, Los-Ancelesdə keçirilən Abundance Summit tədbirində çıxışı zamanı Uber-in bu sahədə böyük potensiala malik olduğunu vurğulayıb.
"Yeni rəhbərlik bizim avtonom avtomobil layihəmizi dayandırdı. O vaxt biz yalnız Waymo-nun arxasında idik, lakin sürətlə irəliləyirdik. Onları ötəcəyimiz ehtimalı yüksək idi. Mən o zaman artıq şirkəti idarə etmirdim, amma indi düşünəndə deyə bilərik ki, kaş avtonom taksi xidməti məhsulumuz olardı" – deyə Kalanick bildirib.
Uber 2020-ci ildə öz-özünə idarə olunan avtomobil texnologiyası sahəsində fəaliyyət göstərən Aurora şirkətinə avtonom sürücülük bölməsini satıb. Bu addım Kalanick-in 2017-ci ildə CEO vəzifəsindən ayrılmasından üç il sonra atılıb.
Crossmedia.az xarici mediaya istinadən xəbər verir ki, o dövrdə bu qərarın əsas səbəbi avtonom sürücülük proqramının yüksək maliyyə xərcləri ilə bağlı olması olub. Uber bu sahəyə yüz milyonlarla dollar sərmayə qoysa da, layihə gəlir gətirmirdi.
Hazırda isə Waymo-nun avtonom avtomobilləri San-Fransisko, Los-Anceles və Finiksdə fəaliyyət göstərir və yeni bazarlara yayılmağa davam edir.
Zeynəb Yunuszadə
00:55 15.03.2025
Oxunuş sayı: 511
