Suriya Prezidentindən tarixi addım - Yeni konstitusiya bəyannaməsi imzalandı
Suriya Prezidenti Əhməd Şəra ölkənin müvəqqəti konstitusiyasının əsas müddəalarını əks etdirən 44 maddəlik Konstitusiya Bəyannaməsini imzalayıb. Bu sənəd prezidentin səlahiyyətlərini Xalq Məclisinə verərək, ölkədə keçid dövrü üçün yeni bir hüquqi çərçivə müəyyən edir.
Crossmedia.az Suriya mediasına istinadən xəbər verir ki, Suriya Prezidentinin imzaladığı bəyannamədə prezidentin səlahiyyətlərinin azaldılması və ya ləğv edilməsi məsələsinin Xalq Məclisinin ixtiyarına verildiyi bildirilib. Prezidentin fövqəladə vəziyyət elan etmək hüququ olduğu və keçid dövrünün beş il davam edəcəyi qeyd olunub. Bəyannamənin təqdimat mərasimində çıxış edən Şəra bu sənədin Suriya xalqı üçün inkişaf yolunda yeni bir başlanğıc olduğunu ifadə edib: “Cahilliyi biliklə, ağrını isə mərhəmətlə əvəz etdiyimiz Suriya üçün yeni bir tarix ümid edirik".
Xatırladaq ki, bəyannamə həmçinin qadınların təhsil və siyasi hüquqlarını təmin edən maddələri, mülkiyyət hüququnu və iş həyatında iştirak hüquqlarını vurğulayır. Dövlətin vətəndaşlara hüquqlarına zəmanət verməsi və müstəqil məhkəmələrin fəaliyyətinin əhəmiyyəti də sənəddə qeyd edilib.
Qeyd edək ki, bu yeni konstitusiya bəyannaməsi Suriya üçün siyasi və hüquqi islahatların başlanğıcı kimi qiymətləndirilir. Şəra Suriya xalqının bu mərhələdən sonra inşaat və inkişaf yolunda yeni bir başlanğıc əldə edəcəyinə ümid etdiyini bildirib.
Gülbəniz Səfərova
23:58 13.03.2025
Oxunuş sayı: 6411
