İsrail ravvinlərinin çağırışı: “Azərbaycan Avraham razılaşmalarına daxil edilməlidir”
Bir sıra tanınmış İsrail ravvinləri ABŞ prezidenti Donald Trampa ünvanladığı məktublarda Azərbaycanı “Avraham Razılaşmaları”na daxil etməyə çağırıb.
Crossmedia.az The Juresalem Post-un məqaləsinə istinadən xəbər verir ki, məktublardan birini BƏƏ-nin baş ravvini Əli Abadi imzalayıb. O, Trampın qayın oğluna yaxın olan Cared Kuşner ilə sıx əməkdaşlıq edərək, razılaşmaların hazırlanmasında əhəmiyyətli rol oynamışdır.
Ravvinlər qeyd edirlər ki, razılaşmalara daxil olan digər ölkələr Vaşinqtonun dəstəyini qazanıb, amma uzun müddətdir İsrail və ABŞ müttəfiqi olan Azərbaycan hələ də bu dəstəkdən məhrum qalır. Bundan əlavə, ölkə ABŞ-ın 907-ci düzəlişi çərçivəsində tətbiq olunan sanksiyalar altında qalır. Bu, Azərbaycanın regional təhlükəsizliyə verdiyi əhəmiyyətə baxmayaraq, ona göstərilən Amerika köməyinin miqdarını azaldır.
Əli Abadi məktubunda Azərbaycanın strateji dəyəri vurğulayaraq, ölkəni İsrail üçün əsas enerji resursları təminatçısı və Şərq ilə Qərb arasında mühüm körpü kimi qiymətləndirib. O, Azərbaycanı, müsəlman dünyasının təzyiqlərinə baxmayaraq, İsrail dövlətinin daimi və etibarlı tərəfdaşı kimi tərifləyir və ölkənin müxtəlif din və mədəniyyətlərin sülh yolu ilə bir araya gəlməsinin unikal nümunəsi olduğunu bildirir.
Əli Abadi məktubunda qeyd edib: “Prezident, sizin siyasətiniz və vizyonunuz Yaxın Şərqdə inqilabi dəyişikliklərə səbəb olur, ABŞ-ın əsas müttəfiqi olan İsrail dövlətini qoruyur və bölgədə sabitlik, sülh və iqtisadi rifahın təmin olunmasına şərait yaradır. İlk prezidentlik müddətinizdə siz Avraham Razılaşmalarını həyata keçirdiniz və indi yeni ölkələrin qoşulması ilə onları daha da gücləndirməyi planlaşdırırsınız. Biz inanırıq ki, Azərbaycanın razılaşmalara daxil edilməsi, bu razılaşmaların əhəmiyyətini artıracaq və bütün Yaxın Şərqdə daha möhkəm sabitliyin qurulmasına töhfə verəcəkdir.”
Bu çağırış bölgədə strateji tərəfdaşlıqların genişlənməsi və Yaxın Şərqdə daha balanslı güc strukturunun formalaşdırılması istiqamətində yeni müzakirələrin başlanmasına səbəb ola bilər.
Mədinə Cəlilova
15:26 12.03.2025
Oxunuş sayı: 4611
