2000 il əvvəl Vezuvi püskürməsi nəticəsində insan beyninin şüşəyə çevrilməsi aşkarlandı
Təxminən 2000 il əvvəl İtaliyada Vezuvi yanardağının eramızın 79-cu ilində baş vermiş püskürməsi nəticəsində Herculaneum şəhərində həyatını itirən gənc bir kişinin beyninin yüksək temperaturda şüşəyə çevrildiyi aşkar edilib.
Alimlər, qurbanın beyninin ən azı 510°C temperaturda qızdırıldığını və sonrasında sürətlə soyuduğunu müəyyən ediblər. Bu proses, üzvi materialın sürətlə soyuyaraq kristallaşmadan bərk hala keçməsi ilə nəticələnən vitrifikasiya adlanır. Bu fenomen, insan toxumasının təbii yolla şüşəyə çevrildiyi ilk məlum haldır.
Roma Tre Universitetindən professor Guido Giordano, beynin şüşəyə çevrilməsi üçün çox xüsusi şəraitin tələb olunduğunu və bu cür tapıntıların çox nadir olduğunu bildirib.
Qeyd edək ki, Vezuvi yanardağının püskürməsi Herculaneum və yaxınlıqdakı Pompeii şəhərlərini tamamilə məhv etmişdi. Alimlər, püskürmə nəticəsində yaranan yüksək temperatur və sürətli soyuma prosesinin qurbanın beyninin şüşəyə çevrilməsinə səbəb olduğunu düşünürlər.
Bu kəşf, qədim vulkan püskürmələrinin təsirlərini anlamaq üçün yeni perspektivlər açır və gələcəkdə bu cür hadisələrin qarşısının alınması və təsirlərinin azaldılması üçün tədbirlərin görülməsinə kömək edə bilər.
Mədinə Cəlilova
06:58 09.03.2025
Oxunuş sayı: 11788
