Çin və Kanada arasında ticarət gərginliyi: Pekin yeni tariflər tətbiq edir
Çin hökuməti, Kanadanın Çindən idxal edilən elektrik avtomobilləri, polad və alüminium məhsullarına tariflər tətbiq etməsinə cavab olaraq, Kanadadan gətirilən bəzi kənd təsərrüfatı və ərzaq məhsullarına əlavə gömrük rüsumları tətbiq edəcəyini elan edib.
Çin Ticarət Nazirliyinin açıqlamasına görə, martın 20-dən etibarən Kanadadan idxal edilən kolza yağı, yağlı tort və fıstıq məhsullarına 100 faiz, su məhsulları və donuz ətinə isə 25 faiz əlavə gömrük rüsumu tətbiq olunacaq.
Bu addım Kanadanın 26 avqust 2024-cü ildən Çindən idxal edilən elektrik avtomobillərinə 100 faiz, polad və alüminium məhsullarına isə 25 faiz tarif tətbiq etməsindən sonra atılıb. Pekin bu tariflərin Ümumdünya Ticarət Təşkilatının (ÜTT) qaydalarına zidd olduğunu iddia edərək 6 sentyabr 2024-cü ildə Kanadaya qarşı rəsmi şikayət təqdim etmişdi.
Bundan əlavə, Çin hökuməti Kanadanın bu tarif qərarını "ayrı-seçkilik" kimi qiymətləndirərək araşdırma başladıb. Bu, Çinin ticarət tarifləri ilə bağlı ayrı-seçkilik iddiası üzrə ilk araşdırmasıdır.
Qeyd edək ki, daha əvvəl ABŞ da Çindən idxal edilən eyni məhsullara bənzər tariflər tətbiq etmiş, Avropa İttifaqı isə Çindən gətirilən elektrik avtomobillərinə verilən subsidiyalarla bağlı araşdırma apararaq tarif artımına qərar vermişdi.
Çinin Xarici Ticarət Qanununun 7-ci maddəsinə əsasən, Pekin, istənilən ölkənin ticarət sahəsində "ayrı-seçkilik" yaratdığı təqdirdə "əks tədbirlər" görmək hüququna malikdir. Bu yeni tarif qərarı Çin və Kanada arasında ticarət münasibətlərinin daha da gərginləşəcəyini göstərir.
02:25 09.03.2025
Oxunuş sayı: 10236
