Rusiya XİN: Ermənistan KTMT-dən çıxmaq niyyətində deyil
Ermənistan Kollektiv Təhlükəsizlik Müqaviləsi Təşkilatından (KTMT) çıxmaq barədə rəsmi bildiriş verməyib və belə bir planı da yoxdur. Bu barədə Rusiya Xarici İşlər nazirinin müavini Aleksandr Pankin Rusiyanın KİV-lərinə açıqlamasında bildirib.
“Ermənistan KTMT-dən çıxmaq niyyətində deyil, sadəcə təşkilatdakı fəaliyyətini dondurub. Bununla belə, o, hələ də təşkilatın üzvü olaraq qalır,” – deyə Pankin vurğulayıb.
O əlavə edib ki, əgər Ermənistan 2025-ci ilin sonuna qədər KTMT-yə üzvlük haqqını ödəməzsə, təşkilatın üzvləri müxtəlif ssenariləri nəzərdən keçirə bilər. “İki illik ödəniş gecikməsi yaranarsa, 2026-cı ilin əvvəlində bu məsələ gündəmə gələ bilər. Lakin heç kimin təşkilatdan çıxarılması gözlənilmir,” – deyə o bildirib.
Pankin həmçinin vurğulayıb ki, əvvəllər də bəzi ölkələr texniki və maliyyə səbəbləri ilə üzvlük haqlarında gecikmələrlə qarşılaşıblar.
Xatırladaq ki, Ermənistanın baş naziri Nikol Paşinyan 2024-cü ilin fevral ayında ölkəsinin KTMT-də iştirakını dondurduğunu açıqlamış və təşkilata qayıtmağın getdikcə daha da çətinləşdiyini bildirmişdi. O, hətta “geri dönüş nöqtəsinin keçildiyini” qeyd etmişdi.
Mədinə Cəlilova
14:55 07.03.2025
Oxunuş sayı: 11070
