Azərbaycanın azad edilmiş ərazilərinin quruculuğunda Belarusun iştirakı müzakirə edilib
Azərbaycan və Belarus azad edilmiş ərazilərin quruculuğunda Minskin iştirakını müzakirə edib.
Crossmedia.az Dövlət Şəhərsalma və Arxitektura Komitəsinə istinadən xəbər verir ki, bu barədə müzakirələr komitə sədri Anar Quliyev və Belarusun ölkəmizdə yeni təyin olunmuş fövqəladə və səlahiyyətli səfiri Dmitri Pineviç arasında keçirilən görüşdə aparılıb.
Azərbaycanda yeni təyinatı münasibətilə qonağı təbrik edən Anar Quliyev qarşılıqlı hörmət və etimada əsaslanan Azərbaycan-Belarus əlaqələrinin dövlət başçılarının səmimi dostluq münasibətləri zəminində yüksək dinamika ilə inkişaf etdiyini bildirib.
Komitə sədri son illər ərzində ölkəmizdə şəhərsalma və memarlıq sahəsində görülən işlər barədə ətraflı məlumat verərək, Belarusun müvafiq qurumları ilə sıx əməkdaşlığın uğurlu nəticələrindən bəhs edib. Ötən il bağlanmış saziş əsasında Ağdam rayonu Qızıl Kəngərli kənd yaşayış məntəqəsinin aqrar şəhərcik formatında layihələndirilməsinin iki ölkə arasında əlaqələrin genişləndirilməsi baxımından əhəmiyyəti xüsusilə vurğulanıb.
Səfir öz növbəsində yaşayış məntəqələrinin və tikinti obyektlərinin layihələndirilməsi üzrə qarşılıqlı faydalı əməkdaşlıqdan məmnunluğunu ifadə edərək, bu istiqamətdə səylərini əsirgəməyəcəyini deyib.
13:20 06.03.2025
Oxunuş sayı: 943
