Moskva İrəvandan konkret addımlar gözləyir
Rusiya hakimiyyəti Ermənistanın baş naziri Nikol Paşinyandan Moskva ilə münasibətləri normallaşdırmaq istəyinə dair konkret “faktlar və sübutlar” gözləyir. Bu səbəbdən Rusiya Federasiya Şurasının sədri Valentina Matviyenkonun İrəvana fevral ayında planlaşdırılan səfəri iyuna qədər təxirə salınıb.
Crossmedia.az saytı xarici mediaya istinadən xəbər verir ki, bu barədə Ermənistanın “Hraparak” qəzeti hakim “Vətəndaş Müqaviləsi” partiyasındakı mənbələrə istinadən məlumat yayıb.
Məlumata görə, Rusiya artıq Ermənistanın baş nazirinin “göz yaşlarına” inanmır və konkret addımlar tələb edir. Moskvanın əsas şərtlərindən biri ölkədə Avropa İttifaqına üzvlüklə bağlı referendum layihəsinin ləğv edilməsidir. Bu səbəbdən sözügedən layihənin parlamentdə ikinci oxunuşu təxirə salınıb və onun tamamilə ləğv edilməsi də istisna edilmir.
Bundan öncə Ermənistan mətbuatı ölkənin dövlət qurumlarına Rusiya ilə əlaqələri aktivləşdirmək tapşırığının verildiyini yazmışdı. Lakin Ermənistan parlamentinin sədri Alen Simonyan bu məlumatları təkzib edərək bildirib ki, erməni rəsmilərinin Moskvaya səfərləri ilə bağlı heç bir problem yoxdur.
Zeynəb Yunuszadə
13:10 06.03.2025
Oxunuş sayı: 833
