"Rusiya Ukraynada tam qələbə qazanmağa yaxındır" -HESABAT
Rusiya Ukraynada tam qələbə qazanmağa yaxındır.
Crossmedia.az xəbər verir ki, bu barədə ABŞ-nin Müharibə Araşdırmaları İnstitunun son hesabatlarında yazılıb.
Qeyd olunub ki, bəzi Rusiya rəsmiləri ABŞ-ın yaxın zamanda Ukraynaya hərbi yardımını dayandıracağına ümid edir və bu addımın Rusiyaya Ukraynada tam qələbə qazandıracağını düşünürlər: "Avstriyanın keçmiş xarici işlər naziri və hazırda Sankt-Peterburq Dövlət Universitetinin Geosiyasi Tədqiqatlar Mərkəzinə rəhbərlik edən Karin Knaysl martın 1-də Kremlin informasiya agentliyinə açıqlamasında “Rusiya qalib gəlib, çünki məğlub olmayıb” deyə bildirib. Rusiya Dövlət Dumasının deputatı Aleksey Juravlyov da martın 1-də çıxış edərək Ukrayna Prezidenti Volodimir Zelenskinin ABŞ-ın verdiyi silahların və maliyyə yardımının böyük hissəsini artıq “itirdiyini” iddia edib. Bəzi rusiyalı rəsmilər ABŞ-dəki Donald Tramp administrasiyasının Ukraynaya yardım məsələsində mövqeyini yalnız bu yardımı dayandırmaqla gücləndirə biləcəyini iddia edirlər. Rusiya Təhlükəsizlik Şurasının sədr müavini Dmitri Medvedev və “Ədalətli Rusiya” Partiyasının lideri Sergey Mironov Trampın bu addımı atacağına dair gözləntilərini ifadə ediblər.Eyni zamanda, bəzi rusiyalı rəsmilər Tramp administrasiyasının guya Ukraynada sülhün yalnız Rusiyanın qələbəsi ilə təmin ediləcəyini qəbul etdiyini iddia ediblər. Rusiya Liberal Demokrat Partiyasının (LDPR) lideri Leonid Slutski Trampın “sülh yalnız Rusiya qələbə qazandıqda mümkün olacaq” fikrini artıq qəbul etdiyini deyib. Lakin Tramp administrasiyasının rəsmi mövqeyi Ukraynanın suverenliyinin qorunmasını dəstəkləyir və Trampın fevralın 26-da verdiyi açıqlamada Ukraynanın öz ərazilərini geri qaytarmalı olduğunu bildirdiyi xatırladılır".
Həmçinin bildirilib ki, Rusiya rəsmiləri bu iddiaları ölkə daxilində Kremlin Ukraynadakı müharibəsini dəstəkləmək məqsədilə irəli sürürlər: "Rusiya Xarici İşlər Nazirliyinin sözçüsü Mariya Zaxarova Ukrayna hökumətinin kapitulyasiyasına nail olmaq, Ukrayna ordusunu məhv etmək və ölkənin dövlətçiliyini tamamilə ləğv etmək məqsədlərindən geri çəkilmədiklərini vurğulayıb. Dövlət Dumasının sədri Vyaçeslav Volodin rus xalqını və siyasətçilərini Vladimir Putinin Ukraynadakı müharibə strategiyasını dəstəkləməyə çağırıb.Bəzi Rusiya rəsmiləri hətta ABŞ-ın Ukrayna Prezidenti Volodimir Zelenskini hakimiyyətdən uzaqlaşdıracağını iddia edərək Kremlin Ukrayna hökumətini zəiflətmək planlarına dəstək verməyə çalışıblar. Dövlət Dumasının deputatı Aleksey Çepa fevralın 28-də ABŞ-ın “Zelenskini necə olursa-olsun hakimiyyətdən uzaqlaşdıracağını” iddia edib. Rusiya tərəfindən işğal olunmuş Krımın rəsmisi Mixail Şeremet isə Trampın Zelenskini “legitim prezident” hesab etmədiyini bildirib".
Qeyd olunub ki, bundan əlavə, rusiyalı rəsmilər ABŞ-ın guya Avropa təhlükəsizliyi məsələsində Rusiyanın mövqeyini dəstəklədiyini iddia ediblər: "Federasiya Şurasının Beynəlxalq Münasibətlər Komitəsinin sədri Qriqori Karasin ABŞ-ın "anti-Rusiya planlarından imtina etdiyini" və Avropa İttifaqı ilə NATO-nun çətin vəziyyətə düşdüyünü iddia edib. Kremlin əsas məqsədi Qərb ölkələri arasında parçalanma yaratmaq və Ukraynaya dəstəyi zəiflətmək olduğu üçün bu cür bəyanatlar daxili auditoriyanı səfərbər etmək və Rusiya cəmiyyətini müharibəyə daha da bağlamaq məqsədi güdür".
Nabat Fərzəliyeva
11:54 06.03.2025
Oxunuş sayı: 1178
