Makron: Avropanın təhlükəsizliyi üçün yeni strategiya lazımdır
Fransa Prezidenti Emmanuel Makronun son bəyanatları Avropanın təhlükəsizliyi və qlobal geosiyasi dinamikası baxımından yeni mərhələnin başlandığını göstərir. Makron Rusiyanın artan hərbi gücünü və Qərbə qarşı aqressiv addımlarını Avropa üçün ciddi təhlükə kimi qiymətləndirib.
Crossmedia.az xarici KİV-ə istinadla xəbər verir ki, prezident Ukraynanın kapitulyasiyasını istisna edərək, Avropanın öz təhlükəsizliyini təmin etməli olduğunu vurğulayıb. Bundan əlavə, Fransa lideri Avropa İttifaqının kollektiv müdafiəsi və qitənin gələcək təhlükəsizlik arxitekturası ilə bağlı mühüm müzakirələrə başlamaq niyyətində olduğunu bəyan edib.
Makronun çıxışı Avropa dövlətlərinin müdafiə siyasətində yeni yanaşmalara ehtiyac duyduğunu ortaya qoyur. Xüsusilə Fransanın nüvə qüvvələrinin qoruyucu rolunu vurğulaması və Avropa qoşunlarının Ukraynada yerləşdirilməsini istisna etməməsi Qərbin Rusiyaya qarşı strategiyasının daha sərt konturlar ala biləcəyinə işarə edir.
Makron xalqa müraciətində Rusiyanın Avropa üçün əsas təhlükəyə çevrildiyini bildirib. O, Ukraynanın kapitulyasiyasına qarşı çıxdığını və Rusiyanın diktəsi altında sülhün mümkün olmadığını vurğulayıb.
Həmçinin, prezident onu da qeyd edib ki, Rusiya 2030-cu ilə qədər 3 milyon əsgəri səfərbər etməyi və 4 min tank istehsal etməyi planlaşdırır. Bu kontekstdə Fransa lideri Avropanın kollektiv müdafiəsi ilə bağlı yeni müzakirələrə başlamaq qərarına gəldiyini açıqlayıb.
O, Fransanın nüvə qüvvələrinin bütün Avropanı qorumaq potensialına malik olduğunu qeyd edərək, bu məsələ ətrafında geniş müzakirələrin aparılmasının vacibliyini vurğulayıb. Bundan əlavə, gələn həftə Fransa Ukraynanın gələcək sülhünü təmin etməyə hazır olan ölkələrin Baş Qərargah rəislərini toplayacaq.
Makron, həmçinin Rusiya tərəfindən Qərbə qarşı hibrid hücumların artdığını, bu hücumların sərhəd tanımadığını və Avropanın müdafiə qabiliyyətinin gücləndirilməli olduğunu bildirib. O, ABŞ-nin Avropanın yanında olacağına ümid etdiyini, lakin əks ssenariyə də hazır olmağın vacibliyini vurğulayıb.
Nigar Yahyazadə
08:32 06.03.2025
Oxunuş sayı: 10598
