Trampın sözləri Zelenskiyə baha başa gəldi: ABŞ yardımı kəsir
ABŞ Mərkəzi Kəşfiyyat İdarəsinin (MKİ) direktoru Con Ratkliff prezident Donald Tramp və Ukrayna prezidenti Vlodimir Zelenski arasında Oval kabinetdə keçirilən görüşdən sonra Vaşinqtonun Kiyevə kəşfiyyat dəstəyi və hərbi yardımları müvəqqəti dayandırdığını təsdiqləyib.
Crossmedia.az xarici KİV-ə istinadən xəbər verir ki, Ratkliff Fox Business kanalına verdiyi açıqlamada bu qərarın Trampla Zelenski arasındakı müzakirələrdən sonra qəbul edildiyini bildirib.
ABŞ mediasının məlumatına görə, keçən cümə Oval kabinetdə baş tutan görüş zamanı Tramp və Zelenski arasında fikir ayrılığı yaranıb.
Planlaşdırılan birgə mətbuat konfransı ləğv edilib və Zelenski Ağ Evi tək tərk edib. Müzakirə mövzularından biri olan nadir torpaq elementləri ilə bağlı saziş də imzalanmayıb.
Tramp Zelenskinin "Amerika xalqına hörmətsizlik etdiyini" iddia etsə də, Ukrayna prezidenti öz növbəsində üzr istəməyə əsas olmadığını bildirib. Lakin çərşənbə axşamı Konqresdə çıxışı zamanı Tramp Zelenskinin ona məktub göndərdiyini və Ukraynanın nadir torpaqlar haqqında sazişi imzalamağa və sülh danışıqlarına hazır olduğunu ifadə etdiyini açıqlayıb.
MKİ direktoru Ratkliff isə Vaşinqtonun Ukrayna ilə birgə çalışaraq problemi həll etməyə və kəşfiyyat məlumatlarının paylaşılmasını bərpa etməyə ümid etdiyini vurğulayıb.
Aybəniz Səfərova
20:12 05.03.2025
Oxunuş sayı: 7272
