Amazon-un dronları yerə endirildi
Texas ştatının College Station şəhərində yaşayan sakinlər Amazon-un çatdırılma dronlarının dayanmasından sonra bölgədə sakitliyin bərpa olunduğunu bildirirlər.
Ötən il yaz mövsümündə şəhər sakini Mark Smit və qonşuları Amazon Prime Air-in çatdırılma dronlarının yaratdığı fasiləsiz səs-küydən narahat idilər. Gündə bir neçə dəfə evinin yaxınlığından uçan dronlar, sakinlər tərəfindən “uçan zəncirli mişarlar” adlandırılırdı. Smit isə səs-küyü "bütün gün işləyən yarpaq üfürən cihaz" kimi təsvir edirdi.
Crossmedia.az saytının xarici mənbələrə istinadən əldə etdiyi məlumatlara görə, Amazon uzun illərdir ki, kiçik məhsulları bir saatdan az müddətdə müştərilərə çatdırmaq üçün dron xidmətini inkişaf etdirməyə çalışır. Lakin texniki və tənzimləmə problemləri bu prosesi çətinləşdirib. Yanvar ayında proqram təminatı yeniləmə səbəbilə şirkət dronlarını müvəqqəti olaraq yerə endirdi. Hazırda Amazon-un College Station-dakı icarə müqaviləsini sentyabrın 30-da başa vuracağı bildirilir.
Federal Aviasiya Administrasiyasının (FAA) sənədlərinə əsasən, əgər Amazon uçuş planlarını tam həyata keçirsəydi, hər 58 saniyədən bir dron şəhər sakinlərinin üzərindən keçəcəkdi. Lakin indi bölgədə artıq dron görünmür və sakinlər vəhşi təbiətin yenidən canlandığını müşahidə edirlər.
Zeynəb Yunuszadə
18:56 05.03.2025
Oxunuş sayı: 12361
