Ərəb Liqası liderləri Trampın Qəzza vizyonunu rədd edir
Misirin paytaxtı Qahirədə keçirilən Ərəb Liqasının Qəzza zolağının gələcəyi ilə bağlı sammitində ABŞ prezidenti Donald Trampın 2 milyon fələstinlinin didərgin salınmasını nəzərdə tutan “görüş”ü rədd edilib.
Crossmedia.az xarici mənbələrə istinadən xəbər verir ki, fevral ayında Tramp Ağ Evdə İsrailin baş naziri Binyamin Netanyahunu qəbul edərkən ABŞ-ın Qəzza zolağına nəzarəti “daimi” ələ keçirəcəyini və onu “yenidən quracağını” açıqlamışdı.
Ərəb Liqasının Qahirədə keçirilən sammitində Misirin 53 milyard dollarlıq planı təsdiqlənib, HƏMAS nəticəni “alqışlayıb”, İsrail isə bu qərarı rədd edib.
ABŞ hökuməti də ərəb ölkələrinin birgə qərarını müsbət qiymətləndirib, lakin HƏMAS-ın Qəzzada “hakimiyyətdə qala bilməyəcəyini” vurğulayıb.
Ağ Evin Milli Təhlükəsizlik Şurasının sözçüsü Brayan Hyuz bildirib: “Prezident Tramp açıq şəkildə bildirdi ki, HƏMAS Qəzzanı idarə etməyə davam edə bilməz.”
İsrail Xarici İşlər Nazirliyinin sözçüsü Oren Marmorstein “X” üzərində paylaşımında Misirin planının “vəziyyətin reallıqlarını görməməzlikdən gəldiyini” və sammitin bəyannaməsində HƏMAS-ın 7 oktyabr 2023-cü il hücumundan bəhs edilmədiyini, qruplaşmanın pislənilmədiyini bildirib. O, planın “köhnəlmiş perspektivlərə əsaslandığını” müdafiə edib.
Ərəb Liqası ölkələri tərəfindən təsdiqlənən plan Qəzzanı 2030-cu ilə qədər yenidən qurmaq və 2 milyon insanı yerində saxlamaq məqsədi daşıyır.
Ərəb Liqasının baş katibi Əhməd Əbu Qeyt bildirib ki, sammitin yekun bəyannaməsində BMT Təhlükəsizlik Şurası Qəzza və İordan çayının qərb sahilində beynəlxalq sülhməramlı qüvvələr yerləşdirməyə çağırılıb.
Bəyannaməyə əsasən, Misir Qəzzanın yenidən qurulması üçün BMT ilə birgə beynəlxalq konfransa ev sahibliyi edəcək və burada Dünya Bankının nəzarətində olan fond yaradılacaq.
Zəhra Ağayeva
17:57 05.03.2025
Oxunuş sayı: 3175
