Türkiyədə erkən seçki havası: Ərdoğan yenidən namizəd olacaqmı?
Türkiyədəki siyasi vəziyyət və erkən seçki ehtimalı barədə müzakirələr gündəmə gəlir. Prezident Ərdoğanın yaşı və müxalifətin seçki tələbləri bu müzakirələri daha da gücləndirə bilər. Erkən seçki ehtimalı, yalnız ölkənin yaxın gələcəyini deyil, həm də uzunmüddətli siyasi xəritəsini formalaşdıracaq mühüm bir addım ola bilər. Bu vəziyyət, həm də Türkiyənin siyasi gələcəyində köklü dəyişikliklərə, yeni qüvvələrin hakimiyyətə gəlməsinə və mövcud siyasi quruluşda dəyişikliklərə yol aça bilər.
Mövzu ilə bağlı Crossmedia.az-a açıqlamasında Trend BİA baş direktorunun müavini, siyasi şərhçi Rufiz Hafizoğlu bildirib ki, Türkiyədə baş verən hadisələr istər-istəməz Türk dünyasına və Azərbaycana, habelə digər qonşu ölkələrə öz təsirini göstərir: "Bizim istəyimiz odur ki, Türkiyə hər zaman güclü olsun, bir dövlət olaraq sülh və əmin-amanlıq olsun. Bu, Azərbaycan xalqının böyük bir hissəsinin arzusudur. Nəzərə alaq ki, müasir dövrümüzdə ciddi lider böhranı mövcuddur. Bunu yaxın qonşularımızda və Avropa ölkələrində də görmək mümkündür".
O, qeyd edib ki, erkən seçki ehtimalı Türkiyədə həmişə mövcud olub: "Bunu gündəmə gətirən isə Türkiyə müxalifəti olub. Bugünkü siyasi vəziyyət və həmçinin Türkiyə prezidenti Ərdoğanın yaşının çox olması müxalifətin əlində bir “kozır”dır. Hazırda Ərdoğanın xarizması ilə İmamoğlunun xarizması eyni müstəvidə deyil. Keçən ilin son seçkilərində belə bir qeyri-rəsmi xəbər yayıldı ki, bu, Ərdoğanın son seçimidir. Hətta belə bir sual yaranır ki, Ərdoğanın yerinə Türkiyəni idarə edə biləcək liderlər varmı? Bu yerdə bütün gözlər Türkiyə kəşfiyyatının sabiq rəhbəri və hazırkı Xarici İşlər naziri Hakan Fidan üzərində dayanır. Amma təbii ki, bu bir ehtimaldır. Digər tərəfdən, nə qədər AK Parti tavana yansısa da, Milliyətçi Hərəkat Partiyası da yetərincə tavana yansımışdır. Yəni, bu təşkilatlar türk xalqının onurğa sütununu təşkil edir. Belə mövzularda Mansur Yavaşın şəxsiyyəti də zaman-zaman gündəmə gəlir".
Siyasi şərhçi qeyd edir ki, erkən seçki olmasa belə, növbəti seçkilərdə Mansur Yavaş MHP-dən kənarda olsa da, ən azı ideoloji baxımdan MHP-yə bağlılığı var: "Mansur Yavaşın şəxsiyyəti də önə çıxa bilər. Yəni, önümüzdəki illərdə erkən seçki olacağı təqdirdə, əsas rəqabət bu şəxslər arasında ola bilər - Xarici İşlər naziri Hakan Fidan, Mansur Yavaş və Əkrəm İmamoğlu. Təbii ki, sürpriz şəxslər də ola bilər. Bugün təəssüflər olsun ki, Türkiyə siyasətində yeni kadrlar azlıq təşkil edir".
Sonda R.Hafizoğlu əlavə edib: "Belə ki, erkən seçim ehtimalı var amma bu, hakimiyyətin bugünkü iradəsindən asılıdır. Əhməd Davudoğlunun komandasında Ali Babacan, Abdullah Gül və digər AK Parti-dən ayrılan ideoloji qüvvələrin yenidən hakimiyyət uğrunda mübarizəyə bu və ya digər şəkildə mərkəz sağ blokunda qoşulma ehtimalı var".
Fidan Xəlilova
Xumar Əhmədova
18:17 04.03.2025
Oxunuş sayı: 991
