"İğdır-Naxçıvan qaz kəməri: Azərbaycanın enerji diplomatiyasında yeni strateji xətt"
Müasir dünyada enerji təhlükəsizliyi təkcə iqtisadi inkişafın deyil, həm də siyasi sabitliyin əsas şərtlərindən biridir. Dövlətlər enerji təminatını diversifikasiya etməklə yalnız daxili ehtiyaclarını ödəməklə kifayətlənmir, həm də regional güc balansına təsir göstərən mühüm aktora çevrilirlər. Bu baxımdan, Azərbaycan ardıcıl və düşünülmüş enerji siyasəti ilə həm milli, həm də regional maraqlara xidmət edən yeni layihələrə imza atır.
Azərbaycanın enerji diplomatiyası hər zaman yalnız bugünkü ehtiyaclara deyil, gələcəyə hesablanmış strateji planlara əsaslanıb. İğdır-Naxçıvan qaz kəməri isə bu strategiyanın növbəti uğurlu addımıdır. Layihənin icrası Naxçıvanın enerji təminatını dayanıqlı edəcək, Azərbaycan və Türkiyə arasında iqtisadi əlaqələri daha da gücləndirəcək və bütövlükdə regionun enerji təhlükəsizliyini möhkəmləndirəcək. Azərbaycanın uzunmüddətli enerji strategiyasının tərkib hissəsi olan bu layihə, regionun enerji xəritəsində mühüm dəyişikliklərə yol açacaq.
Bu barədə Crossmedia.az saytına açıqlamasında Milli Məclisin deputatı Vüqar Bayramov layihənin əhəmiyyətini vurğulayaraq qeyd edib ki, İğdır-Naxçıvan qaz kəməri Naxçıvanın enerji asılılığını tam aradan qaldıracaq və muxtar respublikanın enerji təhlükəsizliyini təmin edəcək:
"Bu kəmər vasitəsilə Naxçıvana ilkin mərhələdə ildə 750 milyon kubmetr qaz nəql ediləcək. Daha sonra bu rəqəm iki dəfə artırılacaq, bu da muxtar respublikanın artan tələbatını ödəməyə imkan verəcək. Layihənin əsas üstünlüyü fasiləsiz qaz təminatının yaradılması və Naxçıvanın enerji baxımından tam dayanıqlı sistemə çevrilməsidir. Digər mühüm məqam isə budur ki, Naxçıvan ilk dəfə olaraq qazı birbaşa qardaş Türkiyə üzərindən alacaq, bu da enerji təminatında şaxələndirməni tam təmin edəcək."
Deputatın sözlərinə görə, İğdır-Naxçıvan qaz kəməri təkcə Azərbaycan üçün deyil, həm də regionun enerji təhlükəsizliyi baxımından strateji əhəmiyyət daşıyır. Bu layihə həm Azərbaycan-Türkiyə iqtisadi əməkdaşlığını daha da gücləndirəcək, həm də regionda geostrateji enerji balansının formalaşmasına töhfə verəcək. Xüsusilə, Zəngəzur dəhlizinin açılması ilə bu kəmər daha geniş enerji şəbəkəsinin bir hissəsinə çevriləcək və regional enerji inteqrasiyasını sürətləndirəcək.
Nigar Yahyazadə
10:55 04.03.2025
Oxunuş sayı: 979
