Netanyahu: İsrail müharibənin ikinci mərhələsinə hazırlaşır
İsrailin Baş naziri Benyamin Netanyahu ölkəsinin müharibənin növbəti mərhələsinə keçməyə hazırlaşdığını və "bütün qələbə məqsədlərinə çatana qədər dayanmayacaqlarını" bəyan edib.
Crossmedia.az xarici mediaya istinadən xəbər verir ki, Netanyahu bu açıqlamanı İsrail parlamentinin plenar iclasında, 40 deputatın tələbi ilə keçirilən müzakirə zamanı verib.
O, çıxışında 2023-cü il oktyabrın 7-də baş verən hadisələrlə bağlı rəsmi araşdırma komitəsinin yaradılmasının gündəmdə olduğunu bildirib.
Baş nazir İsrailin HƏMAS-a qarşı mübarizəsini davam etdirəcəyini vurğulayaraq, "Biz müharibənin növbəti mərhələsinə hazırlaşırıq. Bütün girovlarımızı geri qaytaracağıq, HƏMAS-ın gücünü tamamilə məhv edəcəyik və Qəzzanın İsrail üçün təhlükə yaratmamasını təmin edəcəyik", – deyə qeyd edib.
Netanyahu, HƏMAS ilə məhbus mübadiləsi nəticəsində bir neçə girovun azad edilməsinə toxunaraq, "Bəziləri hətta bir nəfəri də geri qaytaracağımıza inanmırdı", – ifadəsini işlədib.
Müxalifət və Netanyahu arasında gərginlik
Netanyahunun çıxışı zamanı müxalifət millət vəkilləri onu tez-tez tənqid ediblər. İşçi Partiyasının deputatı Gilad Kariv baş nazirin sözünü kəsərək, "Bunlar uşaqlarını itirmiş ailələrdir! Siz bunu heç bilmirsiniz!" – deyə sərt etirazını bildirib.
Netanyahu isə müxalifətin ittihamlarına cavab olaraq, "Ailələrin yaşadığı kədəri çox yaxşı anlayıram. Ayıb olsun!" – ifadəsini işlədib.
HƏMAS ilə danışıqlar və mümkün hərbi əməliyyatlar
Netanyahu İsrailin ABŞ-ın Yaxın Şərq üzrə nümayəndəsi Steven Whitekoffun təklifini qəbul etdiyini, lakin HƏMAS-ın daha sərt mövqe tutduğunu iddia edib. O, İsrailin HƏMAS ilə razılaşmanı pozmadığını vurğulayaraq, "Əgər danışıqlar nəticə verməsə, 42-ci gündən etibarən müharibəyə qayıtmaq seçimimiz var. Girovlarımız azad edilməsə, HƏMAS ağlına belə gətirə bilməyəcəyi bir bədəli ödəyəcək", – deyə xəbərdarlıq edib.
Müxalifət millət vəkillərinin etirazlarına baxmayaraq, Netanyahu İsrail hökumətinin siyasətini müdafiə edərək, "HƏMAS-a təzyiq etmək əvəzinə, bizə təzyiq edirsiniz və onların təbliğatını təkrarlayırsınız. Bu, girovların geri qaytarılması şanslarına xələl gətirir", – deyə bildirib.
Qeyd edək ki, İsrailin HƏMAS-a qarşı hərbi əməliyyatları və regiondakı gərginlik beynəlxalq ictimaiyyətin də diqqət mərkəzindədir.
Aybəniz Səfərova
22:26 03.03.2025
Oxunuş sayı: 10102
