Elnur Soltanov: "Mingəçevir İES-də qənaət ediləcək qaz "Abşeron" yatağından hasilata bərabərdir"
Mingəçevir şəhərində İstilik Elektrik Stansiyasının (İES) yenidən qurulması nəticəsində 1,5 milyard kubmetr qaza qənaət ediləcək.
Crossmedia.az xəbər verir ki, bunu energetika nazirinin müavini Elnur Soltanov Milli Məclisin Təbii Ehtiyatlar, Energetika və Ekologiya Komitəsində keçirilən ictimai dinləmədə bildirib.
Onun sözlərinə görə, bu həcm "Abşeron" qaz yatağından hasil edilən qaza bərabərdir: "Bu, həm əhali, həm də dövlət üçün müsbət xəbərdir. Əhali daha ucuz enerji əldə edə biləcək, dövlət isə qənaət olunan qazı digər sahələrə yönləndirə biləcək".
Deputat Sadiq Qurbanov vurğulayıb ki, Azərbaycan enerji resursları ilə zəngin ölkə kimi enerji effektivliyi sahəsində böyük potensiala malikdir.
"Ölkədə enerji istehlakının idarə edilməsi və qənaətcil texnologiyaların tətbiqi sahəsində hələ də təkmilləşdirilməli olan məsələlər var", - deputat deyib.
Qeyd edək ki, Mingəçevir şəhərindəki “Azərbaycan” İstilik Elektrik Stansiyasının ərazisində 1 280 meqavatlıq yeni elektrik stansiyası inşa edilir. Stansiyanın açılışı 2025-ci ildə planlaşdırılır. Yeni elektrik stansiyası və “Azərbaycan” İstilik Elektrik Stansiyasının mövcud 7 və 8-ci bloklarının əlaqələndirməsi nəticəsində ümumi güc 1 880 meqavat olacaq. Bununla da faydalı iş əmsalı 18 % artırılaraq 56 %-ə çatdırılacaq.
Yeni elektrik stansiyasının qaz turbinlərində bir dəfə işlənmiş qaz, utilizasiya yolu ilə suyu buxara çevirəcək və “Azərbaycan” İES-in 7 və 8-ci bloklarının buxar turbinlərində əlavə qaz işlətmədən enerji almağa imkan verəcək.
15:01 03.03.2025
Oxunuş sayı: 1191
