Kobaxidze: Trampa bu mübarizədə səbir və möhkəmlik arzulayıram
Dünən bir daha sülh istəyən qüvvələrlə Ukraynanın son nəfəsinə qədər müharibə aparmaq istəyənlər arasında bir xətt çəkilib. "Qlobal müharibə partiyası" və "Dərin dövlət" müharibədən asanlıqla əl çəkməyəcək.
Crossmedia.az xəbər verir ki, bu sözləri Gürcüstanın Baş naziri İrakli Kobaxidze Facebook sosial şəbəkəsində yazıb.
"Dünən bir daha müharibə partiyası ilə sülh partiyası arasında aydın xətt çəkilib. Mən təkcə Tramp və Zelenski arasındakı polemikanı deyil, bu polemikaya verilən reaksiyaları da nəzərdə tuturam. ABŞ Prezidenti Donald Trampın sülh təşəbbüslərini ardıcıl olaraq qanlı müharibəyə yol açan Ukraynanı və minlərlə ukraynalının həyatını qurban verən insanlar pisləyib.
“Qlobal müharibə partiyası” dərhal Trampa qarşı tanınmış natiqləri – Cin Şahindən tutmuş Brüsseldən olan çoxsaylı məmurlara qədər səfərbər edib. Gürcüstanın radikal müxalifət liderləri də onlardan geri qalmayıb. Halbuki, onlar cəmi bir ay əvvəl Trampın inauqurasiyasının arxa otağında çəkdirdikləri "selfi" ilə öyünürdülər. Dünən bir daha sülh istəyən və ukraynalıların taleyindən narahat olan qüvvələrlə Ukraynanın son nəfəsinə qədər müharibə aparmaq istəyən qüvvələr arasında sərhəd çəkilib. Eyni zamanda aydın oldu ki, “Qlobal müharibə partiyası” və “Dərin dövlət” müharibədən asanlıqla əl çəkməyəcək.
Son 3 ildə sübut etməyə çalışdığımız bir daha təsdiq olundu: ABŞ və “Qlobal müharibə partiyası” – bunlar iki fərqli reallıqdır. Xatırladaq ki, müxaliflərimiz bütün bu illər ərzində onların arasında bərabərlik işarəsi qoymağa çalışırdılar. Müharibə partiyası ilə sülhpərvər qüvvələr arasındakı mübarizə həlledici mərhələyə daxil olur. Ümid edirik ki, bu mübarizə sülhün qələbəsi ilə başa çatacaq. Ukraynadakı müharibə nə qədər tez bitsə, bir o qədər az ukraynalı həyatını itirər və bölgədə sülh bir o qədər tez bərqərar olar. Trampa bu çətin mübarizədə səbir və möhkəmlik arzulayıram", – deyə paylaşımda bildirilir.
Nəzrin Salmanova
17:20 01.03.2025
Oxunuş sayı: 4572
