Kənd təsərrüfatı nazirinin müavini Şərurda vətəndaşların müraciətlərini dinləyib
Kənd təsərrüfatı nazirinin müavini İlhamə Qədimova Şərur Regional Dövlət Aqrar İnkişaf Mərkəzinin inzibati binasında Şərur və Babək rayonlarından olan vətəndaşların müraciətlərini dinləyib, ərizə və şikayətlərinə baxıb.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən bildirilib ki, vətəndaşların müraciətləri əsasən heyvandarlıq təsərrüfatının inkişaf etdirilməsinə dəstək, damazlıq heyvanların lizinqi, kartof toxumu və gübrə ilə təminat, aqrar sığorta, kənd təsərrüfatı təyinatlı torpaqlarda tikinti aparılması və digər məsələlərlə bağlı olub. Nazir müavini İlhamə Qədimova hər bir vətəndaşın müraciətini diqqətlə dinləyib, qaldırılan məsələlərin hərtərəfli öyrənilməsi və qanunvericiliyin tələblərinə uyğun qısa müddətdə həll edilməsi üçün müvafiq tapşırıqlar verib.
Nazir müavini vətəndaşlarla görüş zamanı dövlət başçısının kənd təsərrüfatının inkişafı ilə bağlı imzaladığı sərəncamların kənd təsərrüfatı istehsalçılarının rifah halının yaxşılaşdırılmasına və ölkəmizdə bu sahənin inkişafına təkan verəcəyini vurğulayıb.
Vətəndaşlar göstərilən diqqət və qayğıya görə Prezident İlham Əliyevə minnətdarlıqlarını bildiriblər.
İlhamə Qədimova qəbuldan sonra Şərur Regional Dövlət Aqrar İnkişaf Mərkəzinin kollektivi ilə görüşüb, iş prosesinin təşkili ilə maraqlanıb.
14:05 28.02.2025
Oxunuş sayı: 13879
