Ermənistandan siyasi manipulyasiya: Bilərəkdən vaxtı uzadır
Ermənistan Azərbaycandan sülh sazişi layihəsinə cavab alıb.
Ermənistan Xarici İşlər Nazirliyinin mətbuat katibi Ani Badalyan bildirib ki, Ermənistan Azərbaycandan sülh sazişi layihəsinə cavab alıb.
"Biz Azərbaycandan sülh sazişi ilə bağlı cavab almışıq, lakin digər sahələrdə - kommunikasiyaların blokdan çıxarılması, silahların qarşılıqlı nəzarəti və yoxlanılması mexanizmi ilə bağlı təkliflər cavabsız qalır", - o deyib.
Saziş layihəsi üzrə tərəflər arasında mübadilə artıq iki ildən artıqdır davam edir. Qeyd etmək lazımdır ki, bu təmaslar nəticəsində ikitərəfli münasibətlərin inkişafında, habelə qarşılıqlı etimad mühitinin yaranmasında müəyyən nəticə əldə olunub. Buna baxmayaraq, qət olunmuş yol hələ kifayət deyil.
Ermənistanın sülh sazişi layihələri ilə bağlı səsləndirdiyi fikirlər əslində siyasi manipulyasiyadan başqa bir şey deyil.
Məsələ burasındadır ki, Ermənistanın indiki anda hansısa təkliflə çıxış etməyə nə gücü, nə də haqqı var. Rəsmi Bakı qalib tərəf kimi bir dəfə humanistlik edərək İrəvana sülh təklif edib. İndi Ermənistan hansısa təkliflərlə çıxış edib süni mübahisələr, fikir ayrılıqları yaratmaq əvəzinə, şərtləri qəbul etməlidir. Hər halda əgər İrəvan sülh istəyirsə, başa düşməlidir ki, bu, daha asan və ideal yoldur.
İkinci bir tərəfdən belə təkliflər və təşəbbüslərlə Ermənistan daxili və xarici auditoriyaya proseslərin iştirakçısı olduğunu göstərmək istəyir. Halbuki rəsmi İrəvan heç bir siyasi iradəyə malik deyil və tamamilə xaricdən idarə olunur.
Qarşılıqlı ikitərəfli təmaslar, həmçinin mübadilə ən azından etimad mühitinin yaranması və tərəflərin bir- birinin maraqlarını daha yaxşı anlamaları üçün müəyyən müsbət nəticə verə bilər. Amma proses məhdud səviyyəyə qədər inkişaf edəcək. Ermənistan özü də başa düşür ki, Azərbaycanın əsas tələbini yerinə yetirmədən- ərazi iddialarını özündə ehtiva edən konstitusiya dəyişikliyinə getmədən sülh olmayacaq. İrəvan səmərəsiz və vaxtı uzatmağa, əlavə fikir ayrılıqlara yaratmağa hesablanmış addımlar əvəzinə bu barədə düşünməlidir.
Kənan Novruzov
13:13 26.02.2025
Oxunuş sayı: 29335
