Türkiyə və region ölkələri Qəzzadakı humanitar böhrana qarşı birləşir - ŞƏRH
Türkiyə Qəzzada daimi atəşkəsin təmin edilməsini və bölgəyə fasiləsiz humanitar yardımın çatdırılmasını əsas prioritetlərindən biri hesab edir. Bu barədə Türkiyənin xarici işlər naziri Hakan Fidan Dohada, Qətər hökumətinin başçısı və xarici işlər naziri Məhəmməd bin Əbdül Rəhman Əl Tani ilə birgə keçirdiyi mətbuat konfransında bildirib.
“Bizim əsas məqsədimiz Qəzzada daimi atəşkəsə nail olmaq və bölgəyə humanitar yardımların fasiləsiz çatdırılmasını təmin etməkdir. Bu istiqamətdə irəliləmək üçün bəzi çətinliklərlə üzləşirik. İsrail dağıdıcı siyasətindən əl çəkməlidir”. - deyə Fidan vurğulayıb.
Nazirin sözlərinə görə, Ankara humanitar yardımın bölgəyə çatdırılması üçün Misir də daxil olmaqla region ölkələri ilə sıx əməkdaşlıq edir. O əlavə edib ki, “Türkiyə Fələstin xalqının öz torpaqlarından məcburi köçürülməsinin qəti əleyhinədir”.
Mövzu ilə bağlı Crossmedia.az-a açıqlama verən politoloq Əli Zülfürqaroğlu bildirib ki, İsrail Qəzza əhalisini bölgədən çıxarmaq və ərazini tam nəzarətə götürmək niyyətindədir.
“İsrailin məqsədi Qəzza əhalisinin köçürülməsi və nəticədə birləşdirilməsidir. Amma hesab etmirəm ki, bu planın reallaşması mümkün olsun. Çünki hazırda ABŞ-nin ciddi daxili problemləri var və yerli hakimiyyət bu problemlərlə məşğul olmağı prioritet hesab edir. Ona görə də İsrailin maraqlarının ön plana çıxması və ABŞ-nin İsrailə limitsiz dəstək verməsi hazırkı şəraitdə mümkün deyil”. – politoloq vurğulayıb.
Onun fikrincə, region ölkələri, xüsusilə də Türkiyə, Qəzzadan əhalinin köçürülməsinə sərt şəkildə etiraz edirlər. O qeyd edib ki: “Hazırda Türkiyə və Suriya hökuməti müəyyən yaxınlaşma və əməkdaşlıq prosesindədir. Ankaranın Dəməşqə kifayət qədər təsir imkanları var. Eyni zamanda, Suriya liderinin Səudiyyə Ərəbistanına və Türkiyəyə səfər etməsi bu iki ölkənin Suriya üçün vacib olduğunu göstərir”.
Politoloq Səudiyyə Ərəbistanının Suriya iqtisadiyyatının bərpası üçün mühüm addımlar ata biləcəyini qeyd edib və vurğulayıb ki, “Türkiyə Suriyanın qarantor dövləti rolunu oynaya bilər, çünki Suriya hərbi qüvvələri hazırda zəif vəziyyətdədir”.
O, İsrailin Suriyadakı hərbi mövqelərini gücləndirməyə çalışdığını da qeyd edib: “Əsəd hakimiyyətinin devrilmə ərəfəsində İsrail Suriya hərbi bazalarının 80%-ni məhv etdi. Bununla İsrail, işğal etdiyi Suriya ərazilərinin geri qaytarılmasının qarşısını almağa çalışır. Türkiyə ordusu Suriyada möhkəmləndikdən sonra İsrailə təzyiqlərini artacaq”.
Bundan əlavə, Zülfürqaroğlu Türkiyənin terror təşkilatlarına qarşı mübarizədə aktiv rol oynayacağını və bu məsələdə ABŞ-lə müzakirələrin aparıla biləcəyini bildirib. O əlavə edib ki, “Hazırda Türkiyə və Suriya arasında əsas ortaq maraq Suriyanın ərazi bütövlüyünün qorunması və terror təşkilatlarının bölgədən çıxarılmasıdır. Bunun ardınca Suriya ərazilərində möhkəmlənmiş İsrail ordusunun buradan çıxarılması məsələsi gündəmə gələ bilər. Bu da Türkiyə ilə İsrail arasında ciddi problemlərin yaranmasına səbəb ola bilər”.
Qeyd edək ki, Türkiyə Yaxın Şərqdə sülh və sabitliyin bərqərar olması üçün diplomatik səylərini davam etdirir və humanitar böhranların aradan qaldırılması üçün beynəlxalq ictimaiyyəti birgə fəaliyyətə çağırır.
Maral Şahverdili
15:59 05.02.2025
Oxunuş sayı: 12936
